Nagaon: অগ্ৰণী প্ৰতিষ্ঠান ৰূমী-ৰূপকৰ প্ৰতিষ্ঠাপক, কৃতী শিক্ষক বলেন্দ্ৰনাথ শৰ্মাৰ স্মৃতিচাৰণ অনুষ্ঠান

ৰাষ্ট্ৰীয় বঁটাপ্ৰাপক আদৰ্শ কৃতী শিক্ষক, সমাজসেৱক, অগ্ৰণী প্ৰতিষ্ঠান ৰূমী-ৰূপকৰ প্ৰতিষ্ঠাপক প্ৰয়াত বলেন্দ্ৰনাথ শৰ্মাৰ ২৫সংখ্যক মৃত্যুবাৰ্ষিকী উপলক্ষে আজি এক স্মৃতিচাৰণ অনুষ্ঠান অনুষ্ঠিত হয় ৷ নগাঁও সাংস্কৃতিক প্ৰকল্পৰ সভাগৃহত অনুষ্ঠিত হোৱা স্মৃতিচাৰণ সভাখনৰ বন্তি প্ৰজ্বলনেৰে শুভাৰম্ভ কৰে  প্ৰয়াত শৰ্মাৰ পত্নী নিৰু দেৱীয়ে।

স্মৃতিচাৰণ সভাখনত বিশিষ্ট লেখক-সমালোচক উপেন্দ্ৰ বৰকটকীৰ সম্পাদনাত প্ৰকাশিত "বলেন্দ্ৰনাথ শৰ্মাৰ জীৱন আৰু কৰ্ম" নামৰ গ্ৰন্থখন উন্মোচন কৰে  সাহিত্য অকাডেমী বঁটা প্ৰাপ্ত তথা বিশিষ্ট সাহিত্যিক ড০ অপূৰ্ব শৰ্মাই।

গ্ৰন্থখন উন্মোচন কৰি ড০ অপূৰ্ব শৰ্মাই ভাষণ প্ৰসংগত কয়- ''প্ৰয়াত বলেন্দ্ৰনাথ শৰ্মা এজন কৰ্মনিষ্ঠ ব্যক্তি আছিল ৷ তেখেতৰ অভাৱনীয় কৰ্মনিষ্ঠা আৰু প্ৰবল ইচ্ছাশক্তিয়ে মোক আকৰ্ষিত কৰিছিল।  নগাঁৱত এটা অধ্যয়নৰ পৰিৱেশ সৃষ্টি কৰাত  অনবদ্য অৰিহণা আছিল।''

শৰ্মাই লগতে কয় যে কিতাপৰ লগত অভিভাৱক আৰু ছাত্ৰ-ছাত্ৰীৰ সম্পৰ্ক গঢ়ি তুলিছিল। লগতে বিশিষ্ট সাহিত্যিকগৰাকীয়ে  কয় যে বাতৰি কাকতৰ চাহিদা বৃদ্ধিত অসম আন্দোলনে এক সুযোগ আনি দিছিল। সেই সময়ত বাতৰি কাকতৰ প্ৰচলন বৃদ্ধি পাইছিল, প্ৰয়াত শৰ্মাই বাতৰি কাকতৰ প্ৰতি মানুহৰ আগ্ৰহ আৰু আসক্তি বৃদ্ধি কৰিছিল ৷

 প্ৰচণ্ড শ্ৰমশক্তিৰ বাবেই বলেন্দ্ৰ নাথ শৰ্মাই এখন প্ৰাইমেৰী বিদ্যালয়ক মাধ্যমিক আৰু মাধ্যমিক বিদ্যালয়ক হাইস্কুল পৰ্যায়লৈ ৰূপান্তৰ কৰাটো সহজ হৈ পৰিছিল বুলিও ড০ অপূৰ্ব শৰ্মাই উল্লেখ কৰে। জ্যেষ্ঠ সাংবাদিক জিতেন বৰকটকীয়ে আঁত ধৰা স্মৃতিচাৰণ সভাখনত বিশিষ্ট সাহিত্যিক গৱেষক ড০ নৰেন কলিতা উপস্থিত থাকি ভাষণ প্ৰসংগত কয় যে শিক্ষক হিচাপে বলেন্দ্ৰনাথ শৰ্মাৰ এক বিশেষ পৰিচিতি আছিল ৷

উক্ত সভাখনত বিশিষ্ট সাংবাদিক তথা অসমীয়া প্ৰতিদিন কাকতৰ সহযোগী সম্পাদক প্ৰকাশ মহন্ত উপস্থিত থাকি ভাষণ প্ৰসংগত কয় যে সমাজৰ হিতৰ বাবে নীৰৱে কাম কৰি যোৱা এজন আদৰ্শ ব্যক্তি আছিল বলেন্দ্ৰ নাথ শৰ্মা৷ তেওঁ কৰ্তব্যপৰায়ণ আৰু কঠোৰ অনুশাসন মানি চলা ব্যক্তি আছিল।

 উক্ত সভাখনত বিশিষ্ট সাংবাদিক নৰেশ কলিতা উপস্থিত থাকি ভাষণ প্ৰসংগত কয় যে প্ৰয়াত বলেন্দ্ৰনাথ শৰ্মা অকল বাতৰি বিতৰক প্ৰতিষ্ঠানৰ লগত জড়িত নহয়, শিক্ষাৰ প্ৰসাৰৰ লগতো জড়িত আছিল ৷ নগাঁওখন বৌদ্ধিক দিশত আগুৱাই নিয়াত বলেন্দ্ৰনাথ শৰ্মাৰ গুৰুত্ব পূৰ্ণ অৱদান আছিল ৷

স্মৃতিচাৰণ সভাখনত বিশিষ্ট সাংবাদিক তথা গল্পকাৰ মনোজ গোস্বামী উপস্থিত থাকি কয় যে সাহিত্য-সংস্কৃতিৰ বাতাৱৰণ সৃষ্টি কৰাত বলেন্দ্ৰনাথ শৰ্মাই এক গুৰুত্বপূৰ্ণ ভূমিকা গ্ৰহণ কৰিছিল। অনুষ্ঠানত নগাঁও জিলা সাহিত্য সভাৰ সভাপতি পৰাণ কুমাৰ বৰুৱাই  বলেন্দ্ৰ নাথ শৰ্মাৰ জীৱন কৃতিৰ ওপৰত আলোকপাত আগবঢ়ায়।

এই স্মৃতিচাৰণ সভাত আদৰণী ভাষণ আগবঢ়াই প্ৰয়াত বলেন্দ্ৰ নাথ শৰ্মাৰ পুত্র তথা নগাঁও সদৰ সমষ্টিৰ বিধায়ক ৰূপক শৰ্মাই কয়- মই ২৫টা বছৰ পিতৃৰ লগত আৰু ২৫টা বছৰ পিতৃহীনভাৱে পাৰ কৰিলোঁ।পিতৃৰ অনুপস্থিতিত তেওঁৰ আদৰ্শ শিৰত লৈ কাম কৰাৰ বাবে আগবাঢ়ি গৈছোঁ।'' স্মৃতিচাৰণ সভাত নগাঁৱৰ সমাজ জীৱনৰ লগত জড়িত বিভিন্ন ক্ষেত্ৰৰ ভালেসংখ্যক বিশিষ্ট ব্যক্তিয়ে অংশগ্ৰহণ কৰে। আজিৰ এই অনুষ্ঠানতে বিধায়ক ৰূপক শৰ্মাই তেওঁৰ প্ৰয়াত পিতৃ বলেন্দ্ৰ নাথ শৰ্মাৰ নামত এটি ন্যাস গঠন কৰাৰ কথাও ঘোষণা কৰে।সভাত শলাগৰ শৰাই আগবঢ়ায় বলেন্দ্ৰ নাথ শৰ্মাৰ সহধৰ্মিণী নিৰু দেৱীয়ে।

অসমীয়াত ব্ৰেকিং নিউজ সৰ্বপ্ৰথম News18 অসমীয়াত| শেহতীয়া খবৰ, লাইভ নিউজ আপডেট. সবাতোকৈ বিশ্বাসযোগ্য অসমীয়া নিউজ ৱেবছাইট News18 অসমীয়া|