কোনে অগ্নিসংযোগ কৰিলে সোণাৰিৰ অভয়পুৰ বনাঞ্চলত? অব্যাহত আছে জুইৰ তাণ্ডব!

চৰাইদেউ জিলাৰ সোণাৰিৰ অসম-নগালেণ্ড সীমান্তত থকা অভয়পুৰ সংৰক্ষিত বনাঞ্চলত চাৰিদিন পূৰ্বে কোনো দুষ্কৃতিকাৰীয়ে অগ্নিসংযোগ কৰে। আৰু এই জুইয়ে এতিয়া অভয়াৰণ্যখনত ভয়ংকৰ ৰূপ ধাৰণ কৰিছে।

এই জুই এতিয়া বনাঞ্চলখনৰ ন ন অঞ্চললৈ বিয়পি পৰিছে ৷ বিগত চাৰিদিন ধৰি অব্যাহত থকা এই অগ্নিকাণ্ড নিৰ্বাপন কৰিবলৈ বন বিভাগৰ লগতে জিলা প্ৰশাসনে যৎপৰোনাস্তি চেষ্টা অব্যাহত ৰাখিছে৷

বনাঞ্চলখনত অগ্নি নিৰ্বাপনৰ বাবে শনিবাৰে জিলা উপায়ুক্ত পল বৰুৱা, আৰক্ষী অধীক্ষক সুধাকৰ সিঙৰ লগতে ভাৰতীয় সেনাবাহিনীৰ এটা দল উপস্থিত হয় ৷ আনহাতে অগ্নিকাণ্ড সংঘটিত হোৱা স্থান পৰিদৰ্শন কৰে যোৰহাট লোকসভা সমষ্টিৰ সাংসদ তপন কুমাৰ গগৈ আৰু সোণাৰি সমষ্টিৰ বিধায়ক ধৰ্মেশ্বৰ কোঁৱৰে ৷

বিধায়ক ধৰ্মেশ্বৰ কোঁৱৰৰ তৎপৰতাত বন বিভাগে বিষয়টোত অধিক গুৰুত্ব প্ৰদান কৰিছে আৰু শীঘ্ৰে অগ্নি নিৰ্বাপিত হোৱাৰ আশা প্ৰকাশ কৰিছে।