দক্ষিণ কামৰূপৰ হাতীপাৰাত দুৰ্বৃত্তই জ্বলাই দিলে ছয়খনকৈ ব্যৱসায়িক প্ৰতিষ্ঠান, লুটি নিলে ১০ লক্ষাধিক টকাৰ সামগ্ৰী

দক্ষিণ কামৰূপৰ ছয়গাঁও হাতীপাৰাত ঘৰৰ মানুহক পণবন্দী কৰি লুটপাত চলালে এক বৃহৎ দুৰ্বৃত্তৰ দলে ৷ দুৰ্বৃত্তৰ দলটোৱে ৬খনকৈ দোকান ভাঙি লণ্ডভণ্ড কৰাৰ লগতে প্ৰায় ১০ লক্ষাধিক টকাৰ সা-সামগ্ৰী লুট কৰি নিয়ে৷ অকল সেয়াই নহয়, ডকাইতি কাণ্ড সংঘটিত কৰি হাতীপাৰাৰ আব্দুৰ ৰহমান নামৰ লোকজনৰ ঘৰত অগ্নি সংযোগ কৰে দুৰ্বৃত্তৰ দলটোৱে৷

নিশা বৰষুণৰ সুযোগ লৈ দুৰ্বৃত্তৰ দলটোৱে চলাইছিল এই লুটপাত৷ পিছত গাঁওৰক্ষী বাহিনীয়ে গৰৈমাৰী আৰক্ষীক খবৰ দিয়াত আৰক্ষীয়ে ঘটনাস্থলীত উপস্থিত হৈ জুই নিৰ্বাপণ কৰাৰ লগতে অস্ত্ৰধাৰী দুৰ্বৃত্তৰ দলটোৰ হাতৰ পৰা পৰিয়ালটোক ৰক্ষা কৰে৷

দীৰ্ঘদিন ধৰি হাতীপাৰা চক বজাৰৰ এডোখৰ ভূমিক লৈ দুটা ফৈদৰ মাজত চলি আছিল বিবাদ আৰু সেই বিবাদৰ আঁত ধৰি হাতীপাৰাৰ ফাজিল হকৰ ফৈদৰ প্ৰায় ৫০জনীয়া দুৰ্বৃত্তৰ দল এটাই আব্দুৰ ৰহমানৰ পৰিয়ালৰ ভূমিত থকা ৬খনকৈ দোকানত লুটপাত চলোৱাৰ উপৰি অগ্নিসংযোগ কৰে৷ ইয়াৰোপৰি আব্দুৰ ৰহমানৰ পৰিয়ালৰ দুটাকৈ গৰু চুৰি নিয়া বুলি অভিযোগ উত্থাপন কৰিছে ভুক্তভোগী পৰিয়ালটোৱে৷