ব'হাগ বিহুক লৈ অযথা ৰাজনীতি-বিৰ্তক নকৰিব, সকীয়ালে ULFA-Iৰ মুখ্য সেনাধ্যক্ষ পৰেশ বৰুৱাই

শনিবাৰে ডিমৌত বিজেপিৰ যুৱ মৰ্চাৰ কৰ্মী আৰু শিল্পী মানস ৰবীনৰ মাজত হৈছিল তীব্ৰ সংঘাত। আনকি বিজেপি কৰ্মীয়ে মানস ৰবীনক শাৰীৰিক ভাবে অপদস্থ কৰিবলৈও চেষ্টা কৰে। শিল্পী মানস ৰবীনে ৰঙালী বিহুক বিজেপিয়ে ৰাজনীতিকৰণ কৰিছে বুলি অভিযোগ আনি ‘ককাই অ’ বিহুখনক ৰাজনীতিকৰণ নকৰিবি’ বুলি লিখা এখন হৰ্ডিং ডিমৌত লগাবলৈ চেষ্টা কৰোতেই বিজেপিৰ যুৱ মৰ্চাৰ কৰ্মীয়ে মানস ৰবীনক বাধা প্ৰদান কৰাৰ লগতে সেই ঠাই ত্যাগ কৰিবলৈ নিৰ্দেশ দিয়ে। ফলত দুয়ো পক্ষৰ মাজত তীব্ৰ সংঘাতৰ সুত্ৰপাত হয়।

এই সন্দৰ্ভত এতিয়া প্ৰতিক্ৰিয়া ব্যক্ত কৰিছে আলফা(স্বা) মুখ্য সেনাধ্যক্ষ পৰেশ বৰুৱাই।   News18ক টেলিফোন কৰি পৰেশ বৰুৱাই ক'লে, ‘বিহুক লৈ কোনেও ৰাজনীতি কৰিব নালাগে ৷ BJPৰ যুৱ মৰ্চাই মানস ৰবীনক বুজাই ক'ব লাগিছিল ৷ তাকে নকৰি যুৱ মৰ্চাই অযথা উগ্ৰভাৱে কথা ক'ব নালাগিছিল ৷ বিহুক লৈ সকলোৱে সংযত হোৱাৰ প্ৰয়োজন ৷’

‘হেপাঁহৰ ব'হাগ বিহুৰ পূৰ্বে এনে বিৰ্তক সকলোৱে এৰাই চলক ৷ ২০১৮ত গুৱাহাটী-যোৰহাটত কংগ্ৰেছেও পাতিছিল বিহু ৷ বিহু আয়োজন কৰি BJPয়ে লগোৱা বেনাৰত উল্লেখ নাই যে, কেৱল BJPৰ সমৰ্থনকেহে সেই বিহুত ভাগ ল'ব পাৰিব ৷ যদি উল্লেখ কৰিলেহেঁতেন, তেতিয়া ক'বলগীয়া আছিল’। টেলিফোনত NEWS18ক ক'লে পৰেশ বৰুৱাই ৷

বিহুক লৈ সূত্ৰপাত হোৱা এই বিৰ্তক সন্দৰ্ভত সকলো পক্ষকে সকিয়াই ULFA-Iৰ মুখ্য সেনাধ্যক্ষ পৰেশ বৰুৱাই লগতে ক'লে, ‘বিহুক লৈ অযথা বিৰ্তক নকৰিব ৷ বিহুক লৈ উগ্ৰতা প্ৰদৰ্শনৰ পৰা বিৰত থাকক সকলো পক্ষ ৷ যদি উগ্ৰতা প্ৰদশৰ্ন কৰে আৰু সংযত নহয়, ৰাইজৰ লগতে ULFA-Iয়েও প্ৰতিবাদ কৰিবলৈ বাধ্য হ'ম ৷’

উল্লেখযোগ্য যে শিৱসাগৰৰ ডিমৌত BJPৰ যুৱ মৰ্চাই লগাইছিল এখন বেনাৰ ৷ বেনাৰ খনত 'ভাৰতীয় জনতা পাৰ্টিৰ উদ্যোগত থাওৰা সমষ্টিবাসীৰ সহযোগত ২৪, ২৫ আৰু ২৬ এপ্ৰিলত' ৰঙালী বিহু আয়োজন কৰা হৈছে বুলি উল্লেখ কৰা হৈছিল ৷ বেনাৰখনত মুখ্যমন্ত্ৰীৰ ফ'টো আৰু বিজেপিৰ চিহ্ন আছিল ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।