মহানগৰীৰ নুনমাটিত নাৰকীয় ঘটনা, লাঠিৰে কোবাই কোবাই এজন লোকক হত্যা

News18 Assam | News18-Assam
Updated:January 19, 2021, 8:01 PM IST
মহানগৰীৰ নুনমাটিত নাৰকীয় ঘটনা, লাঠিৰে কোবাই কোবাই এজন লোকক হত্যা
এই  হৃদয়বিদাৰক ঘটনাটো সংঘটিত হয় নুনমাটি থানাৰ অন্তৰ্গত পূব ত্ৰিনয়নপুৰত।

এই  হৃদয়বিদাৰক ঘটনাটো সংঘটিত হয় নুনমাটি থানাৰ অন্তৰ্গত পূব ত্ৰিনয়নপুৰত।

  • Share this:
গুৱাহাটীৰ নুনমাটিত নৃশংস ঘটনা। বিচাৰ কৰাৰ নামত অঞ্চলটোৰ মুখীয়াই লাঠিৰে কোবাই কোবাই এজন যুৱকক নৃশংসভাৱে হত্যা কৰে। এই  হৃদয়বিদাৰক ঘটনাটো সংঘটিত হয় নুনমাটি থানাৰ অন্তৰ্গত পূব ত্ৰিনয়নপুৰত।

উল্লেখযোগ্য যে পূব ত্ৰিনয়নপুৰ বাসিন্দা ৰাজু দাসে (৩৫) দিন হাজিৰা কৰি চাৰিজনীয়া পৰিয়ালটোক পোহ পাল দি আছিল। যোৱা ৬ জানুৱাৰীত ৰাজু দাসৰ পত্নী আনিমা দাসে ওচৰত অনুষ্ঠিত হোৱা ভোজ–ভাত অনুষ্ঠানত উদ্দাম নৃত্য প্ৰদৰ্শন কৰিছিল। ইয়াকে লৈ নিশাৰ ভাগত ৰাজু দাস আৰু পত্নী অনিমা দাসৰ কাজিয়াৰ সূত্ৰপাত হয়। পত্নী অনিমা দাস ঘৰৰ পৰা ওলাই গৈ পূব ত্ৰিনয়নপুৰ উন্নয়ন সমিতিৰ সভাপতি মুন শৰ্মা আৰু সম্পাদক উৎপল দত্তক সাক্ষাৎ কৰি স্বামীৰ বিৰুদ্ধে বিচাৰ দিয়ে।

সিদিনা নিশাই ডেৰ বজাত সভাপতি মুন শৰ্মা আৰু সম্পাদক উৎপল দত্তৰ নেতৃত্বত ১২ জনীয়া দুৰ্বৃত্তৰ দলে ৰাজু দাসৰ ঘৰৰ দুৱাৰ ভাঙি ভিতৰত প্ৰৱেশ কৰি শুই থকা ৰাজু দাসক লাঠিৰে উপৰ্যুপৰি প্ৰহাৰ কৰে। প্ৰহাৰ সহ্য কৰিব নোৱাৰি বিছনাৰ সোমাই যদিও দুৰ্বৃত্তৰ দলটোৱে বিছনাৰ তলৰ পৰা চোচৰাই আনি ঘাইপথলৈ লৈ যায়। ঘাই পথত দুৰ্বৃত্তৰ দলটোৱে লাঠিৰে ৰাজু দাসক প্ৰহাৰ কৰে। পুৱতি নিশা চাৰি বজাত নুনমাটি আৰক্ষীয়ে মুৰ্মূষু অৱস্থাত ৰাজু দাসক উদ্ধাৰ কৰি GMCHত সংকটজনক অৱস্থাত ভৰ্তি কৰায়।

ইয়াৰ মাজতে দুৰ্বৃত্তৰ দলটোৱে আৰক্ষীক মেনেজ কৰি ঘটনাৰ গাপ দিয়াৰ চেষ্টা চলোৱাৰ অভিযোগ উঠিছে। বিগত ১৩ দিন ধৰি চিকিসাধীন অৱস্থাত মৃত্যুৰ সৈতে যুঁজি ৰাজু দাসে সোমবাৰে শেষ নিশ্বাস ত্যাগ কৰে। মৃত্যুৰ পিছতে হত্যাকাৰী দলটোৱে ৰাজু দাসৰ মৃতদেহটো গাড়ীত উঠাই GMCH ৰ পৰা গাড়ীত উঠাই গোপনে লৈ যোৱাৰ চেষ্টা চলায়। ঠিক সেই সময়তে স্থানীয় ৰাইজ ঘটনাস্থলীত উপস্থিত হৈ মৃতদেহটো দুৰ্বৃত্তৰ কবলৰ পৰা উদ্ধাৰ কৰি আৰক্ষীক খবৰ দিয়ে। আৰক্ষীয়ে আজি মৃতদেহটো মৰণোত্তৰ পৰীক্ষা কৰি পৰিয়ালৰ লোকক গতাই দিয়ে।

ইপিনে হত্যাত অভিযুক্ত মুন শৰ্মা আৰু উৎপল দত্ত সহ ১২ জনীয়া দুৰ্বৃত্তৰ দলটোৱে পলায়ন কৰিছে। আৰক্ষীয়ে পলাতক হত্যাকাৰী কেইজনক  গ্ৰেপ্তাৰ কৰিবলৈ তীব্র অভিযান চলাই আছে যদিও আৰক্ষীয়ে অভিযুক্তৰ কোনো শুংসূত্ৰ উলিয়াব পৰা নাই। ঘটনা সন্দৰ্ভত আৰক্ষীয়ে ভাৰতীয় দণ্ড বিধিৰ 302 নং ধাৰাৰ অধীনত থানাত 54/21 নম্বৰত এটা গোচৰ ৰুজু কৰি তদন্ত অব্যাহত ৰাখিছে।
Published by: Sanjay Kumar Das
First published: January 19, 2021, 7:52 PM IST
আৰু চাওক
পৰৱৰ্তী বাতৰি

শেহতীয়া বাতৰি