ৰঙাপৰাত এতিয়া চৌদিশে হাতী আৰু হাতী, বন্যহস্তীৰ কেইবাটাও জাকে সৃষ্টি কৰিছে ত্ৰাসৰ

ৰঙাপৰাত ক্ৰমান্বয়ে বৃদ্ধি পাইছে হাতী–মানুহৰ সংঘাত৷ ৰঙাপৰাৰ চৌদিশে কেৱল হাতী আৰু হাতী৷ বন্যহস্তীৰ কেইবাটাও জাকে ৰঙাপৰাৰ বিভিন্ন অঞ্চলত সন্ত্ৰাসৰ সৃষ্টি কৰি অহাত ৰাইজে উজাগৰি নিশা কটাবলগীয়া হৈছে৷ গাঁৱে–ভূঞে সকলোতে হাতীৰ সন্ত্ৰাস৷ নিশাটো বাদেই এতিয়া দিনৰ ভাগতো বন্যহস্তীয়ে পথ চলাইছে উপদ্ৰৱ। কি ৰাজপথ কি ৰে’ল পথ সকলোতে বন্যহস্তীৰ মুক্ত বিচৰণ৷

বন্যহস্তীৰ জাকে ধাননি পথাৰ গছকি তহিলং কৰাত মূৰে–কপালে হাত দিছে কৃষক ৰাইজে৷  বন্যহস্তীৰ জাকে চাহ বাগিচাৰ মাজত বিচৰণ কৰাত অতি ভয় আৰু শংকাৰ মাজেৰে বাগিচাৰ চাহ শ্ৰমিকসকলে পাত তুলিবলগীয়া হৈছে৷ একাংশ লোকে বন ধবংস কৰি ফৰেষ্ট ভিলেজ স্থাপন কৰিছে, যাৰ ফলত বন্যহস্তীবোৰ খাদ্যৰ সন্ধানত জনবসতিপূৰ্ণ অঞ্চললৈ ওলাই আহিবলৈ বাধ্য হৈছে৷

সোণাই ৰূপাই অভয়াৰণ্য আৰু নামেৰী ৰাষ্ট্ৰীয় উদ্যানৰ পৰা খাদ্যৰ সন্ধানত ওলাই অহা বন্যহস্তীৰ জাক পুনৰ বনাঞ্চললৈ খেদি পঠোৱাৰ ক্ষেত্ৰত বন বিভাগ ব্যৰ্থ হোৱাৰ অভিযোগ উঠিছে৷ যাৰ বাবেই এতিয়া ৰঙাপৰাত হাতী আৰু মানুহৰ সংঘাত ক্ৰমান্বয়ে বৃদ্ধি পাব ধৰিছে৷