যোৰহাটত নাহৰফুটুকীৰ ওপৰত জপিয়াই পৰিল আন এটা খঙাল নাহৰফুটুকী, তাৰ পিছত হ’ল এয়া...

যোৰহাটৰ এটি আৱাসিক অঞ্চলৰ সমীপতে মঙ্গলবাৰে পুৱা চাহবাগিচাৰ মাজত পৰি থকা অৱস্থাত উদ্ধাৰ হয় এটি নাহৰফুটুকী বাঘ । গুজৰি-গুমৰি থকা বাঘটোক একাংশ লোকে চুই চোৱাৰ লগতে একাংশই চিঙি নিয়ে বাঘটোৰ নোম । কিছু লোকে অৱশ্যে নাহৰফুটুকীটোৰ শুশ্ৰুষাৰ চেষ্টাও কৰে । সতকাই দেখিবলৈ নোপোৱা এই দৃশ্যৰ আঁৰত আছে এখন তয়াময়া যুঁজ ।

মঙলবাৰে পুৱাই চাহবাগিচালৈ ওলাই যোৱা দুজনমান লোকে প্ৰত্যক্ষ কৰে গুজৰি-গুমৰি পৰি থকা আহত নাহৰফুটুকী বাঘটো । খোজকাঢ়ি যাবলৈয়ো অক্ষম হৈ পৰা নাহৰফুটুকীটোক একাংশ যুৱকে দাঙি আনে পথৰ কাষলৈ । ইয়াৰ পিছতে খবৰ দিয়া হয় বনবিভাগক । অসহায় আহত নাহৰফুটুকী  বাঘটোক একাংশ লোকে চুই চোৱাৰ লগতে একাংশই ফটোও তোলে । কিছুসংখ্যক লোকে হিংস্ৰ বাঘটোক পানী খুৱাই শুশ্ৰুষা কৰাৰ চেষ্টাও কৰে । মঙ্গলবাৰে পুৱা এই বিৰল দৃশ্য দেখিবলৈ পোৱা গল যোৰহাটৰ চিনামৰা চাহ বাগিচাৰ মুৰমুৰীয়া ডিভিজনত ।

দৰাচলতে এখন হাবিত যে দুটা বাঘ থাকিব নোৱাৰে সেই প্ৰচলিত বাক্যশাৰিৰে সত্যতা পৰিলক্ষিত হল যোৰহাটৰ চিনামৰা চাহবাগিচাত । সোমবাৰে নিশা চাহবাগিচাখনৰ ভিতৰত দুটা নাহৰফুটুকীৰ মাজত লাগে তয়াময়া যুঁজ । এই যুঁজত ধৰাশায়ী হয় এটা নাহৰফুটুকী । গুৰুতৰভাৱে আঘাটপ্ৰাপ্ত হৈ মৃত্যুৰে সৈতে যুঁজি বাগিচাৰ মাজতে পৰি ৰয় এটা নাহৰফুটুকী । পুৱা বাগিচালৈ অহা একাংশ লোকে এই দৃশ্য প্ৰত্যক্ষ কৰাৰ পিছত নাহৰফুটুকীটোৰ চিকিৎসাৰ বাবে বন বিভাগক খবৰ দিয়া হয় যদিও পুৱা ১১ বজালৈকে  বাঘটোৰ কাষত উপস্থিত হব নোৱাৰিলে বনবিভাগৰ লোক । অৱশ্যে চাহবাগিচা কৰ্তৃপক্ষই নাহৰফুটুকীটোক সুৰক্ষা দি অপেক্ষা কৰি ৰয় বনবিভাগ তথা পশুচিকিৎসকৰ দল অহালৈকে ।

"দুটা নাহৰফুটুকীৰ মাজত কালি নিশা তয়াময়া যুঁজ লাগিছিল । এই যুঁজতে গুৰুতৰ ভাৱে আহত হয় এই নাহৰফুটুকী বাঘটো । আমি পুৱাতে বনবিভাগ তথা পশু চিকিৎসকক খবৰ দিছো । সোনকালে বাঘটোৰ চিকিৎসাৰ ব্যৱস্থা কৰিব পৰা হলে ভাল আছিল । এতিয়া পুৱা এঘাৰ বাজিছে আৰু নাহৰফুটুকীটোৰ অৱস্থা অধিক শোচনীয় হৈ পৰিছে ।", চিনামৰা চাহবাগিচাৰ পৰিচালকে এনেদৰে কয় ।

অৱশেষত আৰক্ষীৰ লোক উপস্থিত হোৱাৰ কিছুসময় পিছতে  বনবিভাগৰ এটি দল ঘটনাস্থলীত উপস্থিত হৈ গুৰুতৰ ভাৱে আহত নাহৰফুটুকীটোক গাড়ীত লৈ যায় । স্থানীয় লোকে জানিবলৈ দিয়া মতে এই অঞ্চলটোত বহু নাহৰফুটুকী বাঘ আছে আৰু পোহনীয়া জীৱজন্তু তথা স্থানীয় লোকসকলৰ বাবে আতঙ্ক হৈ পৰিছে এই নাহৰফুটুকী বাঘবোৰ ।

অসমীয়াত ব্ৰেকিং নিউজ সৰ্বপ্ৰথম News18 অসমীয়াত| শেহতীয়া খবৰ, লাইভ নিউজ আপডেট. সবাতোকৈ বিশ্বাসযোগ্য অসমীয়া নিউজ ৱেবছাইট News18 অসমীয়া|