লখিমপুৰৰ কোৰোণাত আক্ৰান্ত চিকিত্‍সকৰ সংস্পৰ্শলৈ অহা তিনিগৰাকীৰ দেহত কোৰোণাৰ অৱস্থিতি, কৰিছিল বাৰ্থ দ্যে পাৰ্টীও!

লখিমপুৰৰ কোৰোণাত আক্ৰান্ত চিকিত্‍সকৰ সংস্পৰ্শলৈ অহা তিনিগৰাকীৰ দেহত নতুনকৈ ধৰা পৰিছে কোৰোণাৰ অৱস্থিতি। চিকিৎসক জনৰ মাতৃ, পেহীয়েক আৰু এগৰাকী সমন্ধীয় ভনীয়েক আক্ৰান্ত হ’ল কোৰোণা ভাইৰাছত। জানিব পৰা মতে, চিকিত্‍সকজনৰ দেহত কোৰোণাৰ অৱস্থিতি ধৰা পৰাৰ পিছত ঘৰৰ আটাইকৈ কোৱাৰেণ্টাইন কৰা হৈছিল।

উল্লেখযোগ্য যে, কোৰোণাত আক্ৰান্ত  চিকিৎসকজন প্ৰথম অৱস্থাৰ পৰাই লখিমপুৰ ‘ওম প্ৰকাশ ডিনোডিয়া মহাবিদ্যালয়ৰ’ কোৱাৰেণ্টাইন কেম্পৰ তত্ত্বাৱধায়কৰ দায়িত্বত আছিল। আনকি মাজে মাজে কৰ্মৰত পানীগাওঁ হাস্পতালতো সেৱা অব্যাহত ৰাখি ৰোগীক চোৱা-চিটা কৰিছিল।

দায়িত্বৰ বাবে পৰিয়ালৰ পৰা দুমাহ আঁতৰি থকা চিকিত্‍সকজনৰ জন্মদিনৰ দিনা পৰিয়ালৰ লোকে কৰিছিল বিশেষ আয়োজন। দুমাহৰ পিছত চিকিত্‍সকজন  জন্মদিনৰ দিনা ঘৰলৈ যায়। আৰু পৰিয়ালৰ লোক, দুই এজন বন্ধুৰ সৈতে জন্মদিনৰ পাৰ্টীত অংশ লয়। কিন্তু ঘৰত ৪ ঘণ্টা কটোৱাৰ পিছতে চিকিত্‍সকজনৰ দেহত কোৰোণাৰ অৱস্থিতি ধৰা পৰাৰ তথ্য লাভ কৰে।

ইয়াৰ পিছতে  জন্মদিনৰ দিনাই  দেহত কোৰোণা ধৰা পৰাৰ পিছত চিকিত্‍সকজনক আইছ’লেছন ৱাৰ্ডলৈ প্ৰেৰণ কৰা হৈছিল।  সেইদৰে সংস্পৰ্শলৈ অহা আটাইকেইজনক কোৱাৰেণ্টাইন কৰা হৈছিল। আৰু সোমবাৰে চিকিত্‍সকজনৰ মাক, পেহীয়েক আৰু সম্বন্ধীয় ভনীয়েকৰ দেহত ধৰা পৰে কোৰোণাৰ অৱস্থিতি।