কুইপ'ৰ অপহৃত দুই বিষয়াক লৈ মধ্যস্থতাকাৰী কৌশিক ফুকন EXCLUSIVE

আলফা স্বাধীন আৰু NSCN-Kৰ দ্বাৰা বিগত বৰ্ষৰ ২১ ডিচেম্বৰতে অপহৃত কুইপ' নামৰ তৈলক্ষেত্ৰ খননকাৰী কোম্পানীটোৰ দুই বিষয়াক লৈ প্ৰথমবাৰৰ বাবে মুখ খুলিলে মধ্যস্থতাকাৰীয়ে৷ News18ৰে হোৱা এক আছুতীয়া সাক্ষাৎকাৰত মধ্যস্থতাকাৰী কৌশিক ফুকনে ক'লে যে ইতিবাচক দিশত বিষয়টো আগবাঢ়িছে৷

News18ৰে হোৱা সাক্ষাৎকাৰত ফুকনে ক'লে- "মই বিগত ২৫ দিনে বিষয়টোৰ সৈতে জড়িত হৈ আছো৷ মই চলাই যোৱা প্ৰচেষ্টাত আলফা স্বাধীন আৰু কুইপ'ৰ মাজৰ আলোচনা ইতিবাচক দিশত আগবাঢ়িছে৷ আশা কৰিছো কুশলে উভতি আহিব অপহৃত কুইপ'ৰ দুই বিষয়া৷”

ইতিমধ্যে আলফা স্বাধীনৰ মুখ্য সেনাধ্যক্ষ পৰেশ বৰুৱাই দেওবাৰে সন্ধিয়া ঘোষণা কৰে যে সভ্য সমাজৰ বিপুল দাবীত কুইপ'ৰ দুই বিষয়াক সোমবাৰৰ পৰা পৰ্যায়ক্ৰমে দিবলগীয়া চৰম শাস্তি স্থগিত ৰাখিছে৷ একাংশ সংবাদ মাধ্যমত বিষয়টোক লৈ অপব্যাখ্যা চলোৱা হৈছে বুলিও পৰেশ বৰুৱাই দাবী কৰে৷

ইয়াৰ পিছতে News18ৰে হোৱা এক আছুতীয়া সাক্ষাৎকাৰত মধ্যস্থতাকাৰী কৌশিক ফুকনে দুই এদিনৰ ভিতৰতে সকলো মধ্যস্থতা সম্পন্ন হ'ব বুলি আশা প্ৰকাশ কৰে৷