অখিল গগৈক পুনৰ গুৱাহাটী কেন্দ্ৰীয় কাৰাগাৰলৈ প্ৰেৰণ, অখিলে ক’লে – ‘সাংঘাতিক যন্ত্ৰণাত আছো...’

ডিচেম্বৰ মাহত ৰাজ্যজুৰি নাগৰিকত্ব সংশোধনী আইনৰ বিৰুদ্ধে হোৱা প্ৰতিবাদৰ সময়ত সংঘটিত হোৱা হিংসাত্মক ঘটনাত চানমাৰি আৰক্ষীয়ে গ্ৰেপ্তাৰ কৰিছিল কৃষক মুক্তিৰ উপদেষ্টা অখিল গগৈক৷ তাৰ পিছত গোচৰটো হস্তান্তৰ হৈছিল NIAলৈ৷ NIAই গ্ৰেপ্তাৰ কৰাৰ পিছতে প্ৰায় তিনি মাহৰ পিছত NIAৰ গোচৰটোত জামিন লাভ কৰিছিল অখিল গগৈয়ে৷

NIA আদালতৰ জামিনৰ ৰায়ৰ বিৰুদ্ধে গুৱাহাটী উচ্চ ন্যায়ালয়ৰ কাষ চাপিছিল NIA–এ৷ গুৱাহাটী উচ্চ ন্যায়ালয়ে আবেদনৰ শুনানিৰ পিছত NIA আদালতৰ ৰায়ৰ ওপৰত স্থগিতাদেশ জাৰি কৰিছিল৷ সেই মতে ডিব্ৰুগড় কেন্দ্ৰীয় কাৰাগাৰত হাজোতি হৈ থকা অখিল গগৈক হাজিৰ কৰা হয় গুৱাহাটীস্থিত NIAৰ বিশেষ আদালতত৷

আদালতত উপস্থিত হৈয়ে অখিল গগৈয়ে সংবাদ মাধ্যমৰ আগত কয় – ‘‘

সাংঘাতিক ধৰণৰ যন্ত্ৰণাত আছো, চৰকাৰে আৰু তিনিটা গোচৰ জাপি দিছে যাতে কাৰাগাৰৰ পৰা ওলাব নোৱাৰো ৷ ৰাইজলৈ অনুৰোধ সকলো লোক বেমাৰৰ পৰা আঁতৰত থাকক৷ পেট্ৰ'ল–ডিজেলৰ দাম কমাব লাগে৷ চাৰি–পাঁচ লাখ লোক যিসকল বাহিৰত আবদ্ধ হৈ আছে তেওঁলোকক ঘূৰাই আনক৷ কৃষকক ক্ষতিপূৰণ দিব লাগে৷"

আনহাতে, NIAৰ 13/2019 গোচৰটোত আদালতে অখিল গগৈক ন্যায়িক জিম্মালৈ প্ৰেৰণ কৰে৷ ইফালে চাবুৱা আৰক্ষী থানাৰ বিষয়া টুলুমণি দুৱৰাক কা আন্দোলনৰ সময়ত কৰা আক্ৰমণৰ ঘটনাৰ গোচৰটোও NIAই লৈছে৷ আজি সেই গোচৰটোৰ শুনানিৰ দিন আছিল যদিও ডিব্ৰুগড়ৰ পৰা গোচৰটোৰ তথ্য নহা কাৰনে ৩ মে’ৰ পিছত শুনানি গ্ৰহণ কৰিব আদালতে৷

আনহাতে 13/2019 নম্বৰ গোচৰটো আদালতত হাজিৰ কৰা হ’ল ধৈৰ্য কোঁৱৰ আৰু বিতু সোণোৱালকো৷ গোচৰটোৰ পৰৱৰ্তী শুনানিৰ দিন ১৩ মে’ ধাৰ্য কৰিছে আদালতে৷