'ৰজাৰ শাসন চলে বাবে ভূটানত কম পেট্ৰ'ল-ডিজেলৰ মূল্য'- যুক্তি দিলে ৰাজ্যিক বিজেপিৰ সভাপতি ভৱেশ কলিতাই

'বিজেপিয়ে ৫ খন আসন লাভ কৰাটো নিশ্চিত ৷ কোনো কাৰণত বিজেপিৰ আসন নকমে ৷ কংগ্ৰেছে ২ নহয় ১০ খন আসন পাব ৷' অধিক আত্মবিশ্বাসী কংগ্ৰেছক সমালোচনা বিজেপিৰ সভাপতি ভৱেশ কলিতাৰ ৷

ইপিনে মূল্যবৃদ্ধিকলৈও মন্তব্য কৰে ৰাজ্যিক বিজেপিৰ সভাপতিজনে ৷ ভৱেশ কলিতাই কয় যে, 'বজাৰৰ মূল্যবৃদ্ধি আমি মানি লৈছো ৷ বজাৰত সামগ্ৰী উভয়নদী হ'লে সামগ্ৰীৰ মূল্য কমিব ৷ অচিৰেই অসমত সুস্থিৰ পৰিবেশ আহিব ৷ অসমত হিমন্ত বিশ্বৰ নেতৃত্বৰত সামগ্ৰীৰ দাম নিম্নগামী হ'ব ৷ ৰাজ্যৰ উন্নয়নৰ স্বাৰ্থত উপ-নিৰ্বাচনত বিজেপিক ভোট দিছে জনতাই ৷'

ৰাজ্যিক বিজেপিৰ সভাপতিৰ মতে কিয় ভূটানত কম পেট্ৰ'ল-ডিজেলৰ মূল্য?

এই সন্দৰ্ভত ভৱেশ কলিতাই কয় যে, ' ভূটানত পেট্ৰল ডিজেলৰ মূল্য কম ৷ কাৰণ তাত ৰজাৰ শাসন। ভূটানৰ দৰে ভাৰত নহয় ৷ কিদৰে ভূটান চলে কোনোৱাই যদি নাজানে মই জনাই দিম৷ সেয়েহে তাত মূল্য কম ৷'

ইপিনে দিছপুৰৰ বিধায়ক অতুল বৰাৰ মূল্যবৃদ্ধিৰ যুক্তিক লৈ ভৱেশ কলিতাৰ উত্তৰ- অসুস্থ, বেমাৰী লোকে মিঠাতেল কমকৈ খোৱাটো ভাল ৷ নিৰ্বাচনী অংকত ব্যস্ত থকা যোগান মন্ত্ৰী ৰঞ্জিত দাসক বজাৰ পৰিদৰ্শনৰ আহ্বান সভাপতিৰ ৷