খালছা চেণ্টাৰ নৰ্থ-ইষ্টৰ মহানুভৱতা! প্ৰাগজ্যোতিষ হাউচিং কমপ্লেক্সত যোগান ধৰিলে ২৮হাজাৰ লিটাৰ পানী

 

শুকুৰবাৰে পুৱাই এক হাহাকাৰ পৰিৱেশে বিৰাজ কৰিছিল ঘোৰামৰাস্থিত প্ৰাগজ্যোতিষ হাউচিং কমপ্লেক্সত ৷ কমপ্লেক্সৰ এম ব্লকৰ এগৰাকী আৱাসীৰ দেহত হোম কোৱাৰেণ্টাইন হৈ থকা অৱস্থাতে পোৱা গৈছিল কোৰোণা অৱস্থিতি ৷

মুম্বাইৰ পৰা ৫ জুনত অহা যুৱতীগৰাকীক নিশাই প্ৰশাসনে ভৰ্তি কৰালে গুৱাহাটী চিকিৎসা মহাবিদ্যালয়ত ৷ সমস্যাৰ সৃষ্টি হ'ল পুৱা ৷ কোনো লোকক প্ৰাগজ্যোতিষ হাউচিঙৰ বাহিৰলৈ যোৱা বা ভিতৰলৈ অহাত দিয়া হ'ল বাধা ৷ বিপদৰ কথাটো হ'ল ৩২০টা পৰিয়াল থকা কমপ্লেক্সটোত চূড়ান্ত নাটনি পানীৰ ৷ পানী ক্ৰয় নকৰাকৈ চলিব নোৱাৰে হাউচিঙক কোনো আৱাসীয়ে ৷ বাহিৰৰ পৰা পানীৰ গাড়ী সোমোৱাত বাধা দিয়াত সৃষ্টি হ'ল সমস্যাৰ ৷

News18ত সম্প্ৰচাৰিত বাতৰিত এই সমস্যাৰ বিষয়ে জানিব পাৰি খালছা চেণ্টাৰ নৰ্থইষ্টে ল'লে তাৎক্ষণিক পদক্ষেপ ৷ যোগান ধৰিলে ২৮হাজাৰ লিটাৰ পানীৰ ৷ খালছা চেণ্টাৰ নৰ্থ-ইষ্টে ল’ক ডাউনৰ সময়ছোৱাত অতি সক্ৰিয় ভাৱে আৰ্তজনক যোগান ধৰিছিল আহাৰৰ ৷ খালছা চেণ্টাৰ নৰ্থ-ইষ্টৰ সক্ৰিয় কাৰ্যকৰ্তা জ্যেষ্ঠ সাংবাদিক পুষ্প পাল সিঙে ফেচবুকত লিখিছে
‘News18ত বাতৰি দেখিছিলো পুৱা ৷ পানীৰ গভীৰ সমস্যাৰ কথা জানিব পাৰি আমি ২৮হাজাৰ লিটাৰ খালছা চেণ্টাৰ নৰ্থ-ইষ্টে যোগান ধৰিলো ৷ এটা কথা ভাল হ'ল যে, হাউচিঙটো সম্পূৰ্ণকৈ কণ্টেইনমেণ্ট জ'ন নকৰি কেৱল এম ব্লকটোহে কৰিলে ৷ আমি সদায় সকলোকে সহায়ৰ হাত আগবঢ়াই আহিছো ৷ এই কাম আমি কৰি যাম ৷’