High Speed: আপুনি ৰাজপথত তীব্ৰবেগত বাহন চলাই নেকি ? তেন্তে সাৱধান হওক, ভৰিব লাগিব জৰিমণা...

কাজিৰঙাৰ ৰাজপথেদি পাৰ হৈ গৈছে তেন্তে সাৱধান হওক৷ কাৰণ, ৰাজপথৰে বিভিন্ন বন্যজন্তু অতিক্ৰম কৰাৰ বাবে আপুনি আপোনাৰ বাহনৰ গতিবেগ কাজিৰঙা এলেকাত হ্ৰাস কৰিব লাগিব৷ অন্যথা তীব্ৰবেগী বাহন চলোৱাৰ অপৰাধত আপুনি সন্মুখীন হ’ব জৰিমণাৰ৷

বনবিভাগে কাজিৰঙাৰ ৰাজপথৰ যান-বাহনৰ গতিবিধি নিৰীক্ষণ তথা বন্যজন্তুৰ আহ-যাহ নিৰীক্ষণ কৰিবলৈ যেনি-তেনি কেমেৰা সংস্থাপন কৰাৰ সমান্তৰালভাৱে পৰিবহণ বিভাগে নিৰীক্ষণ কৰি গৈছে যান-বাহনৰ গতিবেগ৷ আনকি, আপুনি অথবা আপোনাৰ চালকে বাহন তীব্ৰবেগত চলোৱাৰ অপৰাধত গোলাঘাট জিলা পৰিবহণ বিভাগে বাহনৰ স্বত্বাধিকাৰীলৈ ই-চালান পঠিওৱাৰ ব্যৱস্থা কৰিছে৷ সেয়ে যদি আপুনি কাজিৰঙাৰ মাজৰে উজনি অথবা নামনিৰ ফালে যাত্ৰা কৰে তেন্তে তীব্ৰবেগত যান-বাহন চলোৱাৰ পৰা বিৰত থাকক৷ আপুনি শুনিলে আচৰিত হ’ব যে ক’ভিড সৃষ্ট পৰিৱেশৰ বাবে যান-বাহনৰ চলাচল একপ্ৰকাৰ নথকাৰ পাছতো গোলাঘাট জিলা পৰিবহণ বিভাগে যোৱা জুলাই মাহত তীব্ৰবেগী যান-বাহনৰ প্ৰায় ৩ হাজাৰ গৰাকীৰ বিৰুদ্ধে গোচৰ ৰুজু কৰি ৬৫ লাখ টকাৰ ই-চালান প্ৰেৰণ কৰি জৰিমনা বিহিছে।