এতিয়ালৈ গ্ৰেপ্তাৰ নহ’ল সাংবাদিক মিলন মহন্তক আক্ৰমণ কৰা ভূ–মাফিয়া তথা জুৱাৰী সঞ্জয় ঠাকুৰীয়া

২৪ ঘণ্টা উকলি যোৱাৰ পিছতো দক্ষিণ কামৰূপৰ সাংবাদিক মিলন মহন্তক আক্ৰমণ কৰা ভূ–মাফিয়া তথা জুৱাৰী সঞ্জয় ঠাকুৰীয়াক গ্ৰেপ্তাৰ কৰিবলৈ সক্ষম হোৱা নাই পলাশবাৰী আৰক্ষী। যাৰ বাবে প্ৰতিবাদ অব্যাহত ৰাখিছে আছুকে ধৰি বিভিন্ন দল–সংগঠনে। আজি ৰাষ্ট্ৰীয় প্ৰেছ দিৱসৰ দিনা সাংবাদিক মিলন মহন্তক চলোৱা নিৰ্যাতনৰ প্ৰতিবাদ মিৰ্জাৰ মনীয়েৰী তিনিআলিৰ ৰাজপথত। স্থানীয় ৰাইজ, আছু আৰু ভিন্ন দল–সংগঠনে সাংবাদিক মিলন মহন্তৰ ওপৰত কৰা আক্ৰমনক তীব্ৰ ভাষাৰে গৰিহণা দি প্ৰতিবাদী কাৰ্যসূচী ৰূপায়ণ কৰে।

আক্ৰমণকাৰী সঞ্জয় ঠাকুৰীয়াৰ লগতে বুদু ঠাকুৰীয়া, বিশ্বজিৎ দাস আৰু গুণ্ডা বাহিনীক শীঘ্ৰে গ্ৰেপ্তাৰ কৰি দৃষ্টান্তমূলক শাস্তিৰ দাবী তোলে সকলোৱে। সমান্তৰালভাৱে আৰক্ষীক ২৪ ঘণ্টাৰ সময়সীমা বান্ধি দিছে ৰাইজে। আনহাতে, ঘটনা সন্দৰ্ভত পলাশবাৰী আৰক্ষী থানাত ৰুজু হৈছে এক গোচৰ। ভাৰতীয় দণ্ডবিধি আইনৰ 341, 324, 325, 392 ধাৰাত 515/20 নম্বৰত এক গোচৰ ৰুজু কৰি আৰক্ষীয়ে অব্যাহত ৰাখিছে তদন্ত। কিন্তু বৰ্তমানলৈকে পলাতক সঞ্জয় ঠাকুৰীয়া, বুদু ঠাকুৰীয়া আৰু বিশ্বজিৎ দাসক গ্ৰেপ্তাৰ কৰিব পৰা নাই পলাশবাৰী আৰক্ষীয়ে। ইফালে পলাশবাৰীৰ ভিন্ন অঞ্চলত আৰক্ষীৰ ছত্ৰছায়াত জুৱা খেল চলি থকাৰ অভিযোগ ৰাইজৰ।