ভয়ংকৰ দুৰ্ঘটনা! পথৰ কাষত বহা বজাৰ মহতিয়াই নিলে গ্ৰেণ্ড i10-এ, গুৰুতৰ ভাবে আহত ৮ জন

পথৰ কাষত বহা অস্থায়ী বজাৰৰ মহতিয়াই নিলে গ্ৰেণ্ড i10 বাহনে। যটোৰহাটৰ বৰহোলা তিনিআলিৰ ৰাজপথত মঙলবাৰে সন্ধিয়া সংঘটিত হ’ল এক ভয়ংকৰ দুৰ্ঘটনা। এগৰাকী শিক্ষকে চলাই যোৱা ‘AS 03 Y 9030’ নম্বৰৰ এখন হোণ্ডাই গ্ৰেণ্ড i10 গাড়ীয়ে মহতিয়াই নিয়ে পথৰ কাষত সামগ্ৰী বিক্ৰী কৰা একাংশ ব্যৱসায়ীক। আঠগৰাকী লোক এই দুৰ্ঘটনাত গুৰুতৰ ভাৱে আহত হৈছে। ইয়াৰে দুজনৰ অৱস্থা অতি সংকটজনক। দুৰ্ঘটনা সংঘটিত কৰা লোকজন হ’ল নৱমিলন হাইস্কুলৰ প্ৰধান শিক্ষক মেদিনী বৰুৱা। আৰক্ষীয়ে গাড়ীখন জব্দ কৰাৰ লগতে মেদিনী বৰুৱাক আটক কৰিছে। আহত লোকসকলক বৰহোলা সামূহিক চিকিৎসালয়ত প্ৰাথমিক চিকিৎসা প্ৰদান কৰাৰ পিছত যোৰহাট চিকিৎসা মহাবিদ্যালয় হাস্পতাললৈ প্ৰেৰণ কৰা হৈছে।

উল্লেখ্য যে, বৰহোলা তিনিআলিত পথৰ কাষত বহা এই অস্থায়ী বজাৰখনৰ পৰা প্ৰায়ে যানজঁটৰ সৃষ্টি হৈ অহাত বজাৰখন দেওবৰীয়া বজাৰ বহা স্থানলৈ স্থানান্তৰ কৰিবলৈ প্ৰশাসনক অনুৰোধ জনোৱা হৈছিল বুলি জানিবলৈ দিছে একাংশ স্থানীয় লোকে। আনহাতে বৰহোলা মহাবিদ্যালয়লৈ যোৱা পথটোৰ কাষটো অনুৰূপ বজাৰ বহাত যাতায়াতৰ ক্ষেত্ৰত ব্যাপক অসুবিধা হৈ অহা বুলি জানিবলৈ দিছে বৰহোলাৰ অসম জাতীয়তাবাদী যুৱ ছাত্ৰ পৰিষদৰ বিষয়ববীয়াসকলে। এই ক্ষেত্ৰত শীঘ্ৰে ব্যৱস্থা গ্ৰহণ কৰি পথৰ কাষত বহা বজাৰসমূহ উচ্ছেদ কৰিবলৈ প্ৰশাসনক অনুৰোধ জনাইছে বৰহোলা এজেৱাইচিপিয়ে।

ঠিক একেদৰে অনুৰূপ সমস্যাই দেখা দি আহিছে যোৰহাট নগৰটো। নগৰখনৰ প্ৰায়বোৰ পথেই বহু কোটি টকা ব্যয় কৰি বহলকৈ পুনৰ ৰ্নিৰ্মাণ কৰা হৈছে। কিন্তু এই বহল কৰি তোলা পথৰ সুবিধা কিন্তু জনসাধাৰণে লাভ কৰা নাই। কাৰণ বহলকৈ নিৰ্মাণ কৰা পথসমূহৰ কাষত একাংশ অস্থায়ী ব্যৱসায়ী বহি একোখন বজাৰৰ সৃষ্টি কৰাত পথটো পুনৰ ঠেক হৈ পৰিছে। ফলত বৰহোলাৰ দৰে ঘটনা যোৰহাটতো সংঘটিত হোৱাৰ পূৰ্ণ সম্ভাৱনা আছে। এই ক্ষেত্ৰত ব্যৱস্থা গ্ৰহণ কৰিবলৈ যোৰহাটৰ বিধায়ক হিতেন্দ্ৰ নাথ গোস্বামীয়ে প্ৰশাসনক নিৰ্দেশ দিয়াৰ লগতে যোৰহাটবাসী ৰাইজকো সহযোগিতা আগবঢ়াবলৈ আহ্বান জনাইছে।