যোৰহাটত চোৰৰ দলে হাত দিলে বেংকৰ ভল্টত, চিচিটিভি ফুটেজৰ ভিত্তিত অনুসন্ধান চলাই আৰক্ষীয়ে আটক কৰিলে তিনিটা চোৰক

যোৰহাট সদৰ আৰক্ষীৰ পুতৌ লগা ছবিখন দিনে দিনে অধিক পৰিষ্কাৰ হ’বলৈ ধৰিছে। যোৰহাটৰ কেইগৰাকীমান আৰক্ষী বিষয়াৰ অকৰ্মন্যতাৰ বাবে সমগ্ৰ যোৰহাট আৰক্ষী বদনামৰ ভাগি হ’বলগীয়া হৈছে। নগৰখনত ক্ৰমাগতভাৱে বৃদ্ধি পাই অহা অপৰাধমূলক ঘটনাসমূহৰ পিছত শেহতীয়াকৈ চোৰৰ দলে হাত দিলেগৈ যোৰহাট নগৰত থকা এটা বেংকৰ ভল্টত।

যোৰহাট আৰক্ষীৰ একাংশ বিষয়াৰ দূৰ্বলতাৰ সুযোগ লৈ বিগত কিছুদিনৰ পৰাই নগৰখনত সন্ত্ৰাসৰ সৃষ্টি কৰিছে অপৰাধীয়ে। আৰু দু:সাহসী চোৰৰ দলে শেহতীয়াকৈ পৰীক্ষামূলক ভাবে হাত দিলেগৈ বেংকৰ ভল্টত। নগৰৰ মাজমজিয়াৰ গড়আলিৰ এটা ভৱনৰ প্ৰথম মহলাত থকা ইণ্ডিয়ান অভাৰচিজ বেংকৰ যোৰহাট শাখাত চোৰৰ এটি তিনিজনীয়া দল প্ৰৱেশ কৰি চুৰিৰ চেষ্টা চলায়। মুখত মাস্ক পৰিধান কৰি অহা চোৰৰ দলটোৱে বেংকৰ ভিতৰত থকা এটা কিয়স্ক মেচিন, চেক ড্ৰপ বক্স ভঙাৰ লগতে বেংকৰ ভল্টটো ভঙাৰ চেষ্টা কৰে যদিও ব্যৰ্থ হয়।

চোৰৰ দলটো ভৱনটোৰ পিছফালৰ এটা সৰু বাটেৰে ভিতৰলৈ প্ৰৱেশ কৰা বুলি সন্দেহ কৰা হৈছে। ইয়াৰ পিছতে চোৰৰ দলটো উক্ত ভৱনটোৰ তলৰ মহলাত থকা একাংশ দোকানৰ তলা ভাঙি ভিতৰত প্ৰৱেশ কৰে। চোৰৰ দলটোৱে লক্ষ্মী স্কুটাৰ হাউছ আৰু লক্ষ্মী অটোমটিভৰ কেচ বক্সত থকা কেইহাজাৰমান টকাও লৈ যায়। ইতিমধ্যে চিচিটিভি ফুটেজৰ ভিত্তিত অনুসন্ধান চলাই যোৰহাট আৰক্ষীৰ নগৰ শাখাই সোমবাৰে নিশা এই ঘটনাৰ লগত জড়িত তিনিটা চোৰক গ্ৰেপ্তাৰ কৰিবলৈ সক্ষম হৈছে ।

এই ঘটনাই নগৰখনত চাঞ্চল্যৰ সৃষ্টি কৰিছে । বেংক কৰ্তৃপক্ষই এই সন্দৰ্ভত কোনো মন্তব্য দিয়াৰ পৰা বিৰত থাকে। কেৱল ধন সংগ্ৰহৰ ওপৰতে অধিক গুৰুত্ব প্ৰদান কৰা যোৰহাট আৰক্ষীৰ কেইগৰাকীমান বিষয়াৰ অকৰ্মন্যতাৰ বাবেই নগৰখনত শেহতীয়াকৈ অপৰাধমূলক ঘটনা বৃদ্ধি পোৱাক লৈ বিভিন্ন মহলত চৰ্চা চলিছে।