পথ নিৰ্মাণেৰে নজিৰ স্থাপনৰ দিশে যোৰহাটৰ বিধায়ক, অচিৰেই নতুন হৈ পৰিব যোৰহাটৰ পৌৰ এলেকাৰ প্ৰায় সকলো পথ

যোৰহাট বিধানসভা সমষ্টিত বৰ্তমানৰ চৰকাৰৰ কাৰ্যকালত নিৰ্মাণ হৈছে অভিলেখ সংখ্যক পথ আৰু নলা। যোৰহাটৰ বিধায়ক তথা বিধানসভাৰ অধ্যক্ষ হিতেন্দ্ৰ নাথ গোস্বামীয়ে নিজে জৰীপ চলাই সমষ্টিটোক পথ যোগাযোগৰ ক্ষেত্ৰত এক নতুন মাত্ৰা প্ৰদান কৰিছে। যোৰহাটৰ ৰাইজৰ এক দীৰ্ঘদিনীয়া সমস্যা সমাধান কৰি নআলি ৰেল ক্ৰছিঙৰ ওপৰত নিৰ্মাণ কৰা ফ্লাই অভাৰখনৰ কাম কেইমাহমানৰ ভিতৰতে সমাপ্ত হ’ব। নগৰখনত চিনামৰা আৰু জেএমচিএইছৰ সন্মুখত আৰু দুখন ফ্লাই অভাৰ নিৰ্মাণ কৰা হ’ব। ইয়াৰে জে’ল ৰোডত নিৰ্মাণ হ’বলগীয়া ফ্লাই অভাৰখনৰ আধাৰশিলা জানুৱাৰীত স্থাপন কৰা হ’ব।

অচিৰেই যোৰহাট বিধানসভা সমষ্টিৰ পৌৰ এলেকাসমূহত বেয়া পথ এটাও নোহোৱা হৈ পৰিব। যোৰহাট বিধানসভা সমষ্টিৰ নগৰ তথা গ্ৰামাঞ্চলৰ পথ যোগাযোগ ব্যৱস্থাৰ ৰূপ একপ্ৰকাৰ সলনি কৰি পেলালে যোৰহাটৰ বিধায়ক তথা বিধানসভাৰ অধ্যক্ষ হিতেন্দ্ৰ নাথ গোস্বামীয়ে।

বিধায়কগৰাকীৰ বিগত প্ৰায় চাৰে চাৰি বছৰীয়া কাৰ্যকালত যোৰহাট নগৰৰ মূল পথসমূহ দুয়োফালৰ পদপথ পৰ্যন্ত বহলকৈ নিৰ্মাণ কৰা হয়। ইয়াৰ উপৰি নগৰৰ পৌৰসভাৰ অন্তৰ্গত এলেকাসমূহত প্ৰায়বোৰ পথেই নলাসহ নতুনকৈ নিৰ্মাণ কৰা হৈছে। বিধায়কগৰাকীয়ে বিভাগীয় বিষয়াসকলক লগত লৈ পুৱাৰ ভাগত প্ৰায়ে নিজে জৰীপ চলাই যোৰহাট সমষ্টিৰ পথ আৰু নলা নিৰ্মাণত সৰ্বাধিক গুৰুত্ব আৰোপ কৰি আহিছে। আৰু ইয়াৰ ফলস্বৰূপে যোৰহাটৰ অধিকাংশ ঠাইৰে পথসমূহে লাভ কৰিছে নতুন ৰূপ।

সমষ্টিটোৰ গ্ৰামাঞ্চলসমূহৰ সকলো পথ অহা তিনি বছৰৰ ভিতৰত পকী হৈ পৰিব বুলি বিধায়কগৰাকীয়ে জানিবলৈ দিয়ে। বিধায়কগৰাকীৰ কাৰ্যকালত যোৰহাট বিধানসভা সমষ্টিত অভিলেখ সংখ্যক প্ৰায় তিনিশ কিলোমিটাৰ পথ নিৰ্মাণ কৰা হৈছে। বিগত চাৰে চাৰিবছৰত যোৰহাট সমষ্টিত কেৱল পথ আৰু নলা নিৰ্মাণৰ বাবে ব্যয় কৰা হৈছে প্ৰায় ডেৰশ কোটি টকা। ইয়াত অৱশ্যে চি আই ডি এফৰ পুঁজিও অন্তৰ্ভুক্ত হৈ আছে।

"মই মোৰ কাৰ্যকালত সৰ্বাধিক গুৰুত্ব দিলো পথ আৰু নলা নিৰ্মাণত। আৰু দুমাহৰ ভিতৰত যোৰহাট পৌৰ এলেকাৰ প্ৰায় সকলোবোৰ পথেই নতুন হৈ পৰিব। বহু নলাও নিৰ্মাণ কৰা হৈছে। সমান গুৰুত্ব গ্ৰামাঞ্চলটো দিয়া হৈছে। অৱশ্যে গ্ৰামাঞ্চলৰ সকলো পথ পকী কৰি তুলিবলৈ আৰু প্ৰায় তিনিবছৰৰ প্ৰয়োজন হ’ব। এই সময়ছোৱাত যোৰহাটৰ উন্নয়ন কিমান হৈছে সেয়া ৰাইজে পূৰ্বৰ সৈতে তুলনা কৰি চালেই অনুভৱ কৰিব।", যোৰহাটৰ বিধায়ক হিতেন্দ্ৰ নাথ গোস্বামীয়ে এনেদৰে কয়।

সেয়েহে যোৰহাট বিধান সভা সমষ্টিত আগন্তুক নিৰ্বাচনত বিজেপিৰ বাবে মূল ইছ্যু হ’ব উন্নয়ন। সমষ্টিটোৰ উন্নয়নৰ ছবিখন আগত ৰাখিয়েই বিৰোধীক ধৰাশায়ী কৰাৰ পৰিকল্পনা প্ৰস্তুত কৰিছে বিজেপিয়ে।