দুবাৰকৈ আধাৰশিলা কৰা মাজুলী-যোৰহাট সংযোগী দলং হ'বগৈ নে?- মৰাণত এই প্ৰশ্ন দেৱব্ৰত শইকীয়াৰ

ৰাজ্যজুৰি কংগ্ৰেছে আৰম্ভ কৰা অসম বচাওঁ অভিযানৰ অংশ হিচাপে শুকুৰবাৰে সন্ধিয়া মৰাণত উপস্থিত হয় কংগ্ৰেছ বিধায়িনী দলৰ নেতা দেৱব্ৰত শইকীয়া ৷ মৰাণৰ কেইবাখনো চাহ বাগিচাত শ্ৰমিকৰে বাৰ্তালাপ কৰা দেৱব্ৰত শইকীয়াই ক'লে, 'মাজুলীত দলং হ'বগৈ নে নাই, সেয়া নীতিন গাডকাৰীক সুধিব লাগিব ৷'

শুকুৰবাৰে সন্ধিয়া মৰাণ সমষ্টিৰ বামুণবাৰীৰ পৰা মটৰ চাইকেল-গাড়ীৰে সমদল কৰি অহা কংগ্ৰেছৰ দলটো বামুণবাৰী চাহ বাগিচাৰ বজাৰত উপস্থিত হয় ৷ বজাৰত গ্ৰাহক-বিক্ৰেতাৰ লগত মত-বিনিময় কৰি দেৱব্ৰত শইকীয়াই বিগত ৫ বছৰত বিজেপি চৰকাৰে দিয়া প্ৰতিশ্ৰুতিসমূহ কিদৰে পূৰণ নকৰি সৰ্বসাধাৰণ ৰাইজক প্ৰৱঞ্চনা কৰিলে সেই সম্পৰ্কত মতামত ব্যক্ত কৰে ৷

ৰাইজৰ অভাৱ-অভিযোগ বুজ লোৱাৰ লগতে পৰামৰ্শ গ্ৰহণ কৰিবলৈ অহা বুলি দেৱব্ৰত শইকীয়াই কংগ্ৰেছক পুনৰ সুযোগ দিবলৈ ৰাইজক আহ্বান জনায় ৷ ইয়াৰ পিছতে দেৱব্ৰত শইকীয়াসহ কংগ্ৰেছৰ দলটো মৰাণ সমষ্টিৰ অন্তৰ্গত খোৱাং চাহ বাগিচাত উপস্থিত হয় ৷ নিশাৰ ভাগত খোৱাং চাহ বাগিচাৰ শ্ৰমিক বিনোদন কেন্দ্ৰত বাগিচাখনৰ শ্ৰমিকসকলৰ সৈতে আলোচনাত মিলিত হয় কংগ্ৰেছ বিধায়কজন ৷

২০১৬ চনত পৰিৱৰ্তনৰ প্ৰতিশ্ৰুতিৰে চৰকাৰ গঠন কৰা বিজেপি চৰকাৰখনে বিগত ৫ বছৰত এটাও প্ৰতিশ্ৰুতি পূৰণ নকৰিলে বুলি উল্লেখ কৰি দেৱব্ৰত শইকীয়াই বিজেপি চৰকাৰে চাহ শ্ৰমিকৰ মজুৰি বৃদ্ধি, চাহ জনগোষ্ঠীক জনজাতিকৰণ, লাখ লাখ নিবনুৱাক কৰ্মসংস্থাপন দিম বুলি চুড়ান্ত প্ৰতাৰণা কৰাৰ অভিযোগ উত্থাপন কৰে ৷

২০১৬ চনত আধাৰশিলা স্থাপন কৰা দলঙখন আৰু এতিয়া আধাৰশিলা কৰা দলং  একেখনেই নে বেলেগ বেলেগ সেয়াও চিন্তনীয় বুলি উল্লেখ কৰি দেবব্ৰত শইকীয়াই কয় 'ডাল মে ক্যুচ কালা হ্যে' ৷ দেৱব্ৰত শইকীয়াৰ লগত দেখা গ'ল মৰাণ সমষ্টিৰ প্ৰাৰ্থীত্ব প্ৰত্যাশী প্ৰাঞ্জল ঘাটোৱাৰক ৷