লকডাউন মানিছেনে যোৰহাট নগৰবাসীয়ে? কঠোৰ লকডাউন বলৱৎ কৰিবলৈ তৎপৰ আৰক্ষী–প্ৰশাসন

শুকুৰবাৰে পুৱাৰে পৰা যোৰহাট নগৰত দেখা গ’ল সম্পূৰ্ণ লকডাউনৰ প্ৰভাৱ । ১৫ জুলাইলৈকে যোৰহাটৰ পৌৰসভাৰ অধীনৰ অঞ্চলসমূহত বাহাল থাকিব সম্পূৰ্ণ লকডাউন । যোৰহাটবাসীয়ে এই লকডাউনৰ প্ৰতি সহাৰি জনাইছে।

শুকুৰবাৰৰ দিনটোত যোৰহাট নগৰৰ ৰাজপথসমূহ শূণ্য হৈ পৰা দেখা যায় । বিগত কেইদিনত যোৰহাটৰ নগৰ অঞ্চলত বহু লোক ক’ভিড 19 ত আক্ৰান্ত হৈছে যাৰ কোনো ট্ৰেভেল হিষ্ট্ৰী নাই। বিগত তিনিদিনত যোৰহাট নগৰৰ জনসমাগম হোৱা অঞ্চলসমূহৰ পৰা ৰেণ্ডম টেষ্টৰ বাবে বহু লোকৰ স্বাব সংগ্ৰহ কৰা হৈছে।

৯ জুলাইত যোৰহাটৰ ৩২ গৰাকী লোকৰ শৰীৰত সঙক্ৰমণ ধৰা পৰাৰ বিপৰীতে শুকুৰবাৰে বিয়লি পৰ্যন্ত ৭ জন লোকৰ শৰীৰত কভিড19 ৰ সংক্ৰমণ ধৰা পৰিছে। আনহাতে শুকুৰবাৰে JMCHত ৯ জন লোক সুস্থ হৈ উঠিছে। যোৰহাট নগৰত লকডাউন কঠোৰ ভাৱে বলৱৎ কৰিবলৈ তৎপৰ হৈ পৰিছে আৰক্ষী আৰু প্ৰশাসন।

"যোৰহাট নগৰবাসীয়ে লকডাউনৰ প্ৰতি সহাৰি জনাইছে । লকডাউন সুস্থিৰ ৰূপত বলৱৎ হৈ আছে। বিভিন্ন স্থানত আৰক্ষী সস্তম হৈ আছে । যদিহে কোনো লোকে চৰকাৰী নিৰ্দেশনা ভংগ কৰে তেন্তে ব্যৱস্থা গ্ৰহণ কৰা হব । কিন্তু ৰাইজে লকডাউন মানিছে ।" , যোৰহাটৰ উপ আৰক্ষী অধীক্ষক বিভাস দাসে নিউজ18 ক এনেদৰে কয় ।
আনহাতে যোৰহাট নগৰত থকা কেইবাটাও বেংক আৰু ডাকঘৰত ৫০% উপস্থিতিৰে কভিড19 ৰ সকলো নিয়ম মানি খুলিবলৈ অনুমতি প্ৰদান কৰিছে যোৰহাটৰ জিলা দণ্ডাধীশে ।

লকডাউনৰ সময়চোৱাত নগৰৰ বৰুৱা চাৰিআলি স্থিত আইচিআইচিআই বেংকৰ যোৰহাট শাখা , এছ বি আই ৰ প্ৰধান শাখা আৰু চাৰ্কোল অফিচ , পঞ্জাৱ নেচনেল বেঙ্ক ( ইউ বি আই )ৰ প্ৰধান শাখা আৰু চাৰ্কোল অফিচ , ইউকো বেঙ্কৰ যোৰহাট শাখা আৰু চাৰ্কোল অফিচ , বেঙ্ক অব বৰোডা ( বিজয়া , ডেনা ) ৰ যোৰহাট শাখা আৰু চাৰ্কোল অফিচ , কানাড়া বেঙ্ক ( চিণ্ডিকেট )ৰ যোৰহাট শাখা , চেন্ট্ৰেল বেঙ্ক অব ইণ্ডিয়াৰ যোৰহাট শাখা আৰু চাৰ্কোল অফিচ , ইণ্ডিয়ান বেঙ্ক ( এলাহাবাদ )ৰ যোৰহাট শাখা , এ জি বি ভি বেঙ্কৰ যোৰহাট শাখা , বন্ধন বেঙ্কৰ যোৰহাট শাখা , এইছ ডি এফ চি বেঙ্কৰ যোৰহাট শাখা , এক্সিছ বেঙ্কৰ যোৰহাট শাখা , ইউনিয়ন বেঙ্ক ( অন্ধ্ৰ )ৰ যোৰহাট শাখা আৰু যোৰহাট প্ৰধান ডাকঘৰৰ কাৰ্যালয় খোলা থাকিব।