যোৰহাটৰ আগশাৰীৰ এখন বিদ্যালয়ে ল’লে গ্ৰামাঞ্চলৰ আন এখন বিদ্যালয়ৰ দায়িত্ব

News18 Assam | News18-Assam
Updated:November 14, 2020, 7:41 PM IST
যোৰহাটৰ আগশাৰীৰ এখন বিদ্যালয়ে ল’লে গ্ৰামাঞ্চলৰ আন এখন বিদ্যালয়ৰ দায়িত্ব
আগশাৰীৰ এখন ব্যক্তিগত খণ্ডৰ বিদ্যালয়ে ইচ্ছা কৰিলে এটা বিশেষ কাম কৰি সমাজলৈ অভূতপূৰ্ব বৰঙণি আগবঢ়াব পাৰে।

আগশাৰীৰ এখন ব্যক্তিগত খণ্ডৰ বিদ্যালয়ে ইচ্ছা কৰিলে এটা বিশেষ কাম কৰি সমাজলৈ অভূতপূৰ্ব বৰঙণি আগবঢ়াব পাৰে।

  • Share this:
আগশাৰীৰ এখন ব্যক্তিগত খণ্ডৰ বিদ্যালয়ে ইচ্ছা কৰিলে এটা বিশেষ কাম কৰি সমাজলৈ অভূতপূৰ্ব বৰঙণি আগবঢ়াব পাৰে। গ্ৰাম্যাঞ্চলৰ এখন বিদ্যালয়ৰ বিদ্যায়তনিক দিশটোৰ দায়িত্ব লৈ এখন ব্যক্তিগত খণ্ডৰ বিদ্যালয়ে আগবঢ়াব পাৰে এই সেৱা। ইয়াৰ ফলত উপকৃত হয় গ্ৰাম্যাঞ্চলৰ ছাত্ৰ ছাত্ৰীসকল। যোৰহাটত এই কাৰ্যক বাস্তৱত ৰূপ দিছে এখন আগশাৰীৰ ব্যক্তিগত খণ্ডৰ বিদ্যালয়ে। প্ৰাৰম্ভিক অৱস্থাত যোৰহাটৰ দিল্লী পাব্লিক স্কুলে চলিত বছৰৰ মাজ ভাগৰ পৰা দায়িত্ব লৈছে গ্ৰাম্যাঞ্চলৰ এখন বিদ্যালয়ৰ।

দিল্লী পাব্লিক স্কুল, যোৰহাটে তেওঁলোকৰ দৃষ্টি প্ৰকল্পৰ অধীনত যোৱা জুন মাহৰ পৰা দায়িত্ব লৈছে গ্ৰাম্যাঞ্চলৰ এখন বিদ্যালয়ৰ। কভিড19 পৰিস্থিতিৰ সময়ছোৱাৰ পৰা পশ্চিম যোৰহাটৰ মালৌখাট জাতীয় বিদ্যালয়ৰ দায়িত্ব গ্ৰহণ কৰিছে যোৰহাটৰ দিল্লী পাব্লিক স্কুল কৰ্তৃপক্ষই। এই বিদ্যালয়খনৰ শৈক্ষিক দিশত ছাত্ৰ ছাত্ৰীসকলৰ সুবিধাৰ্থে প্ৰতিটো বিষয়ৰ পাঠদানৰ বাবে অডিঅ', হাতে লিখা প্ৰশ্নোত্তৰ ইত্যাদি বিতৰণ কৰি ছাত্র ছাত্ৰীসকলক উপকৃত কৰিছে ডিপিএছ , যোৰহাটৰ কৰ্তৃপক্ষই ।

" ডিপিএছ যোৰহাট কৰ্তৃপক্ষই এই বিদ্যালয়খনৰ দায়িত্ব গ্ৰহণ কৰি বিদ্যায়তনিক দিশত ছাত্ৰ ছাত্ৰীসকললৈ বহুখিনি সহায় আগবঢ়াইছে। ভৱিষ্যতলৈয়ো এই সহায় প্ৰদান কৰি যোৱা হব। ", ডিপিএছ , যোৰহাটৰ শিক্ষক অনুৰাগ দেৱগনে এনেদৰে কয়।

দীপাৱলী আৰু শিশু দিৱস উপলক্ষে দিল্লী পাব্লিক স্কুল কৰ্তৃপক্ষই তেওঁলোকৰ ছাত্ৰ ছাত্ৰীসকলে ৰঙ তুলিকা আৰু অন্যান্য সামগ্ৰীৰে প্ৰস্তুত কৰা মাটিৰ চাকিৰ লগতে বহু উপহাৰ মালৌপথাৰ জাতীয় বিদ্যালয়ৰ ছাত্ৰ ছাত্ৰীসকলক প্ৰদান কৰে। ইয়াৰ বাবে মালৌখাট জাতীয় বিদ্যালয়ত এক অনুষ্ঠানৰো আয়োজন কৰা হয়। ডিপিএছ , যোৰহাটৰ এই পদক্ষেপৰ বহুজনে শলাগ লৈছে। গ্ৰাম্যাঞ্চলৰ এই বিদ্যালয়খনৰ ছাত্ৰ ছাত্ৰীসকলৰ শৈক্ষিক আৰু মানসিক বিকাশৰ বাবে ডিপিএছ , যোৰহাটৰ কৰ্তৃপক্ষই ভৱিষ্যতলৈয়ো সহায় কৰি যোৱাৰ প্ৰতিশ্ৰুতি প্ৰদান কৰিছে।
Published by: Himangshu Bhuyan
First published: November 14, 2020, 7:41 PM IST
আৰু চাওক
পৰৱৰ্তী বাতৰি

শেহতীয়া বাতৰি