অৱশেষত জেললৈ যোৰহাটৰ বিতৰ্কিত ব্যৱসায়ী অংকুৰ গুপ্তা, সাংবাদিকৰ মোবাইল কাঢ়ি নিয়াৰ অভিযোগ ...

অৱশেষত জেললৈ যাব লগা হ'ল যোৰহাটৰ এগৰাকী জ্যেষ্ঠ ৰাজনৈতিক নেতা তথা ব্যৱসায়ী । যোৰহাটত প্ৰায়ে চৰ্চাত থকা এই লোকজন হ'ল অংকুৰ গুপ্তা । প্ৰায়ে বিতৰ্কই লগ নেৰা যোৰহাট নগৰৰ এই ব্যৱসায়ীগৰাকী এইবাৰ ৰঙাঘৰৰ আলহী হ'ব লগা হ'ল ।

অংকুৰ গুপ্তাই দুগৰাকী সংবাদকৰ্মীৰ মোবাইল ফোন কাঢ়ি অভব্য আচৰণ কৰাৰ লগতে এগৰাকী মহিলা সাংবাদিকক গতা মাৰি পেলাই দিয়াৰ ফলত গুৰুতৰভাৱে আহত হোৱাৰ অভিযোগত গ্ৰেপ্তাৰ হ'ব লগা হয় ।

বিজেপিৰ জ্যেষ্ঠ নেতা বুলি পৰিচয় দি অহা যোৰহাটৰ অংকুৰ গুপ্তা নামৰ ব্যৱসায়ীজন বৃহস্পতিবাৰে নিশা তেওঁৰ অভব্য আচৰণৰ বাবে যোৰহাট থানাৰ আলহী হ'ব লগা হয় । যোৰহাট নগৰত প্ৰায়ে চৰ্চাত থকা অংকুৰ গুপ্তাই এইবাৰ আক্ৰমণৰ লক্ষ্য কৰি লয় দুগৰাকী সংবাদকৰ্মীক ।  আগন্তুক দেৱালীৰ প্ৰস্তুতিৰ ওপৰত এটি প্ৰতিবেদন প্ৰস্তুত কৰিবলৈ নগৰৰ কচুৰি গলি অঞ্চললৈ গৈছিল সাংবাদিক দুগৰাকী । সেই সময়তে অংকুৰ গুপ্তা নামৰ ব্যৱসায়ীজন আহি বলপূৰ্বক ভাবে তেওঁলোকৰ মোবাইল ফোন দুটা কাঢ়ি লৈ যায় । মোবাইল ফোন দুটা বিচাৰি যাওতে ব্যৱসায়ীজন বাক-বিতণ্ডাত লিপ্ত হয় । অভিযোগ মতে অংকুৰ গুপ্তাই মহিলা সাংবাদিকগৰাকীক গতা মাৰি দিয়াত পথত পৰি যায় আৰু গুৰুতৰভাৱে আঘাতপ্ৰাপ্ত হয় । পিছত চিকিৎসালয়লৈ যোৱাত তেওঁৰ হাতৰ হাড় ফাটি যোৱাৰ কথা পোহৰলৈ আহে ।

এই ঘটনাৰ পিছত অভিযোগ উঠা অনুসৰি অংকুৰ গুপ্তা নামৰ ব্যৱসায়ীজনে তেওঁৰ দোকানত বৃহৎ পৰিমাণৰ ফটকা বিক্ৰীৰ বাবে মজুদ কৰি ৰাখিছিল । আৰু সেই দৃশ্য বন্দী কৰিবলৈ যোৱা বুলি ভাবিয়েই সংবাদকৰ্মী দুগৰাকীৰ পৰা মোবাইল ফোন কাঢ়ি লৈ যায় অংকুৰ গুপ্তাই । অৱশ্যে সেই সময়ত বহু লোক গোট খোৱাৰ লগতে পৰিস্থিতি উত্তপ্ত হৈ পৰাত অংকুৰ গুপ্তাই মোবাইল দুটা ওভতাই দিয়ে ।  সাংবাদিককেইগৰাকীক চিনি নাপাই ভুল বুজাবুজিৰ ফলত এই অবাঞ্চিত ঘটনা সংঘটিত হোৱা বুলি জানিবলৈ দিছে  অংকুৰ গুপ্তাই । আনহাতে বৃহস্পতিবাৰে দিনৰ ভাগত কোনো লোকে ব্যৱসায়ীজনক ধন দাবী কৰা বুলিও জানিবলৈ দিছে ।

এই ঘটনাই যোৰহাটত ব্যাপক প্ৰতিক্ৰিয়াৰ সৃষ্টি কৰিছে । ইতিমধ্যে ঘটনা সন্দৰ্ভত আৰক্ষীক অভিযোগ দিয়াত আৰক্ষীয়ে অংকুৰ গুপ্তাক গ্ৰেপ্তাৰ কৰে । কিন্তু অংকুৰ গুপ্তাক জেললৈ প্ৰেৰণ কৰিবলৈ বহুকেইটা দল , সংগঠনৰ লগতে বিভিন্ন লোকে দাবী জনায় । শুকুৰবাৰ আৰু শনিবাৰৰ দিনটো অংকুৰ গুপ্তাক লৈয়ে যোৰহাট নগৰৰ পৰিৱেশ গৰম হৈ থাকে আৰু অৱশেষত আৰক্ষীয়ে শনিবাৰে বিয়লি অঙ্কুৰ গুপ্তাক জেললৈ প্ৰেৰণ কৰে ।

উল্লেখ্য অংকুৰ গুপ্তাই নগৰখনত বিজেপিৰ এগৰাকী জ্যেষ্ঠ নেতা বুলি পৰিচিত যদিও বৃহস্পতিবাৰে নিশাৰে পৰা যোৰহাট থানাত থকা অংকুৰ গুপ্তাক লগ কৰিবলৈ যোৰহাট থানালৈ এগৰাকী বিজেপি নেতা-কৰ্মীক অহা দেখিবলৈ পোৱা নগ'ল ।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।