সাক্ষীৰ অভাৱ, নাই নেকি কোনো সাহসী প্ৰত্যক্ষদৰ্শী ? অনিমেষ হত্যাকাণ্ডক লৈ বিমোৰত যোৰহাট আৰক্ষী ! সাক্ষী দাতাৰ পৰিচয় গোপনে ৰখাৰো আশ্বাস আৰক্ষীৰ ...

যোৰহাটৰ মাজ মজিয়াতে দিন দুপৰতে মৰিয়াই মৰিয়াই এজাক উন্মাদে হত্যা কৰিছিল আছু নেতা অনিমেষ ভূঞাক ৷ অনিমেষ ভূঞা হত্যাকাণ্ডৰ ১৮দিনৰ পিছতো চাৰ্জশ্বীট দাখিল কৰিব পৰা নাই যোৰহাট আৰক্ষীয়ে ৷ দুৰ্ভাগ্যৰ বিষয় যে, সাক্ষীৰ অভাৱ ঘটিছে দিন দুপৰতে হোৱা হত্যাকাণ্ডটোত ৷ আৰক্ষী প্ৰশাসন পৰিছে এতিয়া বিমোৰত ৷

যোৰহাটৰ এই ঘটনাটোৱে জোকাৰি গৈছিল সকলোকে ৷ বিশেষকৈ সামাজিক মাধ্যমত অনিমেষৰ হত্যাকাৰীক কঠোৰ শাস্তি বিহিবলৈ সৰ্বত্ৰে উঠিছিল জোৱাৰ ৷ পিছে সময় বাগৰিল ৷ হত্যাৰ মূল অভিযুক্ত ক'লা ল'ৰাৰ ৰহস্যজনকভাৱে মৃত্যু হ'ল দুৰ্ঘটনাত ৷ তুঁহ জুইৰ দৰে তিনি চাৰিদিনলৈকে চলি থাকিল #JUSTICE FOR ANIMESH লেখিয়া শ্লোগান ৷ তুঁহ জুইৰ দৰেই হঠাতে নুমাল অসমীয়াৰ আৱেগ ৷ আৰক্ষীক সাক্ষ্য দি চাৰ্জশ্বীট দিয়াবলৈ ওলাই নাহিল কোনো যোৰহটীয়া ৷ যাৰ পৰিপ্ৰেক্ষিতত ২০দিনত দিব পৰা চাৰ্জশ্বীট দিব পৰা নাই আৰক্ষীয়ে,"আমি সঠিক দিশতে আগবাঢ়িছো ৷ কিন্তু, কোনো লোক সাক্ষী দিবৰ বাবে আগবাঢ়ি অহা নাই ৷ সাক্ষী দিয়া লোক পালে আমি ২০দিনতে চাৰ্জশ্বীট দিব পাৰিলোহেঁতেন ৷"—SP। যোৰহাটৰ অনিমেষ ভূঞাৰ হত্যাৰ লগত জড়িত ক'লা ল'ৰাৰ মৃত্যুৰ পিছত আন ১৪জন আছে ন্যায়িক জিম্মাত ৷ যোৰহাটৰ আৰক্ষী অধীক্ষক অংকুৰ জৈনে বিচাৰিছে প্ৰত্যক্ষদৰ্শীৰ সহযোগ ৷ আৰক্ষীয়ে গোপনে ৰাখিব সাক্ষ্য দাতাৰ পৰিচয়, থানালৈও যাব নালাগে সাক্ষী ৷ যোৰহাটৰ আৰক্ষী অধীক্ষক অংকুৰ জৈনে সাক্ষী দি আইনী মেৰপেচত সোমাই পৰাৰ ভয়ত যদি কোনোবা আগবাঢ়ি অহা নাই তেওঁলোককো দিলে অভয় বাণী "ফাষ্টট্ৰেক আদালততে হ'ব গোচৰ নিষ্পত্তি ৷ গতিকে বাৰে বাৰে আদালতলৈ গৈ থাকিব নালাগে সাক্ষ্যদানকাৰী ৷"—অংকুৰ জৈন। ইফালে, এই সমগ্ৰ বিষয়টোত যোৰহাটৰ উপায়ুক্ত অশোক কুমাৰ বৰ্মনেও বিচাৰিলে ৰাইজৰ সহায় ৷ "ৰাইজ আগবাঢ়ি আহিব লাগে ৷ ভয় কৰিবলগীয়া একো নাই ইয়াত ৷ সকলোৱে সহযোগ কৰক আৰক্ষীক ৷ আৰক্ষীয়ে কৈছেই, গোপনে ৰখা হ'ব সাক্ষী দিয়া লোকৰ পৰিচয় ৷"আকৌ এবাৰ প্ৰমান হ'ল অসমীয়াৰ আৱেগ কি? সকলোৱে ভাবিছিল অভি-নীল, দেৱেন দত্ত, ঝংকাৰহঁতে ন্যায় নাপালেও অনিমেষে পাব ৷ কিন্তু চৰম দুৰ্ভাগ্য যে, সেয়াও যেন সপোনহে আছিল ৷ আৱেগৰ তুঁহ জুইত গা গৰম কৰা অসমীয়া নোলাল এতিয়ালৈ অনিমেষৰ হৈ সাক্ষী দিবলৈ ৷ আৰক্ষী প্ৰশাসনে পৰিচয় গোপনে ৰাখিম বুলি আশ্বাস দিয়াৰ পিছতো হাত সাৱতি বহি থকা কোনোবা পুৰুষ ওলাবনে সাক্ষ্য দানৰ বাবে, সেয়া হৈ পৰিছে প্ৰশ্নৰ বিষয় ৷

Read all News in Assamese, Assam News Today, Entertainment News in Assamese, Business News in Assamese, Sports News in Assamese, Health News in Assamese, India News in Assamese