CM Himanta Biswa Sarma : জীৱন সিংহই জিৰণি ল'ব, পৰেশ বৰুৱাৰ সৈতে যোগাযোগ অব্যাহত আছেঃ মুখ্যমন্ত্ৰী

ম্যানমাৰ ত্যাগ কৰি ভাৰতত প্ৰৱেশ কৰিয়েই পোনে পোনে গৈ দিল্লীত উপস্থিত হোৱা KLOৰ অধ্যক্ষই অলপ জিৰণি লোৱাৰ পিছতহে ভাৰত চৰকাৰৰ সৈতে আলোচনাত বহিব ৷ লগতে ULFA-Iৰ সৈতে যোগাযোগ অব্যাহত আছে আৰু নিজৰ কাৰ্যকালৰ ভিতৰতে সমস্যা সমাধান হ'ব বুলি ঘোষণা কৰিছে মুখ্যমন্ত্ৰী ড° হিমন্ত বিশ্ব শৰ্মাই । KLO আৰু ULFA-Iক লৈ মুখ্যমন্ত্ৰীয়ে লোৱা উদ্যোগক সমৰ্থন জনাইছে বিৰোধী AIUDFয়ে ৷

ম্যানমাৰ এৰি এতিয়া দিল্লীত বাহৰ পাতি আছে কমতাপুৰ লিবাৰেচন অৰ্গেনাইজেচন চমুকৈ KLOৰ অধ্যক্ষ জীৱন সিংহ কোচ (Jeevan Singha) ৷ চৰ্চা চলিছে ভাৰত চৰকাৰৰ সৈতে আলোচনা কৰি কম দিনৰ ভিতৰত KLOয়ে কৰিব চুক্তি ৷ চৰ্চা চলিছে পৃথক কমতাপুৰৰ ৷ সম্প্ৰতি Intelligence Bureauৰ সৈতে থকা জীৱন সিংহ সন্দৰ্ভত বৃহস্পতিবাৰে দিল্লীত মুখ্যমন্ত্ৰীয়ে ক'লে- “KLOৰ মুৰব্বী ঘূৰি অহাটো ডাঙৰ খবৰ ৷ এতিয়া কিছু জিৰণি ল'ব জীৱন সিংহই ৷ জিৰণিৰ পিছত কৰিব ভাৰত চৰকাৰৰ সৈতে আলোচনা ৷”

মুখ্যমন্ত্ৰীৰ এই উদ্যোগক সমৰ্থন জনালে AIUDFৰ জ্যেষ্ঠ বিধায়ক ড০ ৰফিকুল ইছলামে ৷ কিন্তু পৃথক কমতাপুৰৰ নামত পুনৰ অসম ভাগ ভাগ কৰাৰ বিৰোধিতা কৰে ৷

কংগ্ৰেছৰ নিলম্বিত বিধায়ক শ্বেৰমান আলি আহমেদেও পৃথক কমতাপুৰৰ বিৰোধিতা কৰি মূলসুঁতিলৈ উভতি অহাৰ বাবে KLOৰ মুৰব্বীক ধন্যবাদ জনায় ৷ ইপিনে BJPৰ সাংসদ কামাখ্যা প্ৰসাদ তাছায়ো মুখ্যমন্ত্ৰীয়ে লোৱা উদ্যোগক আদৰণি জনালে ৷

এইবাৰ আহিল পৰেশ বৰুৱাৰ প্ৰসংগ। আলফা স্বাধীনৰ সৰ্বেসৰ্বা পৰেশ বৰুৱাই সাৰ্বভৌমত্বৰ দাবী পৰিত্যাগ কৰিবলৈ ৰাইজক, দল-সংগঠনক আহ্বান জনাবলৈ মুখ্যমন্ত্ৰীয়ে পহিলা জানুৱাৰীত আহ্বান জনাইছিল ৷ ইয়াৰ পিছত বৃহস্পতিবাৰে মুখ্যমন্ত্ৰীয়ে দিল্লীত ক'লে— “ULFA-Iৰে যোগাযোগ অব্যাহত আছে আৰু এই কাৰ্যকালতে সমস্যা সমাধান হ'ব ৷”

এই বিষয়ত সাংসদ কামাখ্যা প্ৰসাদ তাছাই ক'লে- “ৰাইজৰ আহ্বান মৰ্মে পৰেশ বৰুৱা আলোচনালৈ আহক ৷”

AIUDFৰ বিধায়ক ৰফিকুল ইছলামেও পৰেশ বৰুৱাক মাতিলে আলোচনালৈ ৷ ইপিনে কংগ্ৰেছৰ নিলম্বিত বিধায়ক শ্বেৰমান আলি আহমেদে সশস্ত্ৰ পন্থা ত্যাগ কৰিবলৈ আহ্বান জনালে পৰেশ বৰুৱাক ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।