ULFA-I : পাৰিবাৰিক সংঘাতৰ বাবেও আলফালৈ যাব পাৰে বহু লোক, মুখ্যমন্ত্ৰীৰ ৰাজনৈতিক সচিব জয়ন্ত মল্ল বৰুৱাৰ মন্তব্য

প্ৰতিদিনেই ৰাজ্যৰ ভিন্ন স্থানৰ যুৱক যুৱতীয়ে আলফাত যোগদানৰ উদ্দেশ্যে ঢাপলি মেলিছে অৰণ্যলৈ ৷ আলফা স্বাধীনত নিতৌ অসমীয়া যুৱক যুৱতীয়ে যোগদান কৰাক লৈ বৰপেটাত মুখ্যমন্ত্ৰীৰ ৰাজনৈতিক সচিব জয়ন্ত মল্ল বৰুৱাৰ মন্তব্য- বহুতে পাৰিবাৰিক সংঘাতৰ বাবেও আলফাত যোগদান কৰিব পাৰে!

মুখ্যমন্ত্ৰীৰ ৰাজনৈতিক সচিব জয়ন্ত মল্ল বৰুৱাই কয়, "আলফাৰ প্ৰতি আকৰ্ষিত হোৱা বুলি মই নাভাবোঁ। আলফা গমনৰ সৈতে আন আন সংঘাতৰ কথাও জৰিত হৈ থকাৰ লগতে পাৰিবাৰিক সংঘাতৰ কথাও জৰিত হৈ থাকিব পাৰে।" একে আষাৰতে যুৱপ্ৰজন্ম আলফাৰ প্ৰতি আকৰ্ষিত হৈ পৰা বুলিও মানি লব নুখুজে জয়ন্ত মল্ল বৰুৱাই ৷

তেওঁ আৰু কয়, "প্ৰতি বছৰে এজন-দুজন বা দহজন ল'ৰা আলফালৈ গৈ থাকেই ৷ ৰাজ্যৰ তিনি কোটি ত্ৰিশ লাখ লোকৰ মাজত ক'ৰবাত দহজন বা বিশজন লোক যােৱা কথাটোক আলফাৰ প্ৰতি আকৰ্ষিত হোৱা বুলি ক'ব নোৱাৰি।"

চাৰি বছৰীয়া সন্তানক এৰি অৰণ্যলৈ যোৱা দুই পিতৃ-মাতৃৰ প্ৰসংগতো  জয়ন্ত মল্ল বৰুৱাই তাৎপৰ্যপূৰ্ণ মন্তব্য কৰি কয়, "আচলতে ঘটনাটো কি সেই বিষয়ে জানি ল'ব লাগিব ৷
চাৰি বছৰীয়া সন্তান এৰি আলফালৈ যোৱাক লৈ আমাৰো চিন্তা হয়; কিন্তু ঘটনাটোৰ ভিতৰলৈ গ'লে জনা যায় তেওলোকৰ ব্যক্তিগত জীৱনৰ কিছু কাহিনী জৰিত আছে।"