প্ৰসিদ্ধ চলচ্চিত্ৰ পৰিচালক জাহ্নু বৰুৱা আৰু বিশিষ্ট অভিনেতা অৰুণ নাথলৈ ২০১৯ আৰু ২০২০ চনৰ ‘ৰূপকাৰ বঁটা’ প্ৰদান

২০১৯ আৰু ২০২০ বৰ্ষৰ ৰূপকাৰ বঁটা প্ৰদান। প্ৰসিদ্ধ চলচ্চিত্ৰ নিৰ্মাতা জাহ্নু বৰুৱা আৰু অভিনেতা অৰুন নাথলৈ এই বঁটা৷ প্ৰয়াত সাংবাদিক, বিশিষ্ট সাংস্কৃতিক কৰ্মী প্ৰবিত্ৰ কুমাৰ ডেকাৰ স্মৃতিত ২০১১ চনৰ পৰা সাংস্কৃতিক ক্ষেত্ৰৰ লগত জড়িত লোকসকলক প্ৰদান কৰি অহা হৈছে এই বঁটা ৷ ২০১১ চনৰ পৰা ক্ৰমে ৰত্ন ওজা, তপন দাস, মুনিন বৰুৱা, অৰুণলোচন দাস, শশী ফুকন, নয়ন প্ৰসাদ, সমৰেন্দ্ৰ নাৰায়ণ দেৱ আৰু ২০১৮ চনত তপন দাসক প্ৰদান কৰা হৈছিল এই বঁটা ৷ বঁটা প্ৰদান অনুষ্ঠানত মুখ্য অতিথি হিচাপে উপস্থিত থাকে জ্যেষ্ঠ সাংবাদিক অনুৰাধা শৰ্মা পূজাৰী৷

প্ৰয়াত পবিত্ৰ কুমাৰ ডেকা আছিল ‘সাদিন’ কাকতৰ সাংস্কৃতিক পৃষ্ঠাৰ দায়িত্বত৷ সুদীৰ্ঘ সময়কাল ডেকাই সাংস্কৃতিক পৃষ্ঠাটোৰ চোৱাচিতা কৰিছিল৷ অনুৰাধা শৰ্মা পুজাৰীয়ে ২০০১ চনত সাদিন কাকতৰ সম্পাদকৰ দায়িত্ব গ্ৰহন কৰাৰ সময়ছোৱাৰ পৰা তেওঁৰ  মৃত্যুৰ দিন প্ৰৰ্যন্ত কেনেদৰে সান্নিধ্যলৈ আহিছিল তাক সোঁৱৰে ৷ পবিত্ৰ কুমাৰ ডেকাই অসমৰ সাংস্কৃতিক সম্পদসমূহ সংৰক্ষণৰ বাবে আগভাগ লৈছিল৷ তাৰ বাবে ডেকাই পবিত্ৰ কুমাৰ ডেকা আৰ্কাইভ গঠন কৰিছিল৷ য’ত সংৰক্ষণ কৰি ৰখা হৈছে অসমৰ বহু দুষ্প্ৰাপ্য সমল৷ বিশেষকৈ আৰ্কাইভত চলচ্চিত্ৰ বিষয়ৰ গ্ৰন্থ,আলোচনী, বাতৰি কাকত, আলোকচিত্ৰ, কেছেট, চিডি, ভিচিডি, স্মৰণিকা আৰু বিভিন্নধৰনৰ পুস্তিকা সংৰক্ষণ কৰি ৰখা হৈছে৷