হ্ৰাস পাইছে অসমৰ মানুহৰ প্ৰজনন ক্ষমতা; চৰকাৰী সমীক্ষাত প্ৰকাশ পাইছে বহু গুৰুত্বপূৰ্ণ তথ্য

প্ৰজনন ক্ষমতা হ্ৰাস পাইছে অসমত। ২০১৫-১৬ বৰ্ষত প্ৰতিগৰাকী মাতৃৰ বিপৰীতে আছিল ২.২ গৰাকী শিশু। কিন্তু এতিয়া সেয়া হ্ৰাস পাই হৈছে গৈ ১.৯। অতি সম্প্ৰতি কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰণালয়ৰ নির্দেশত চলোৱা এক সমীক্ষাত প্ৰকাশ পাইছে এই তথ্য।

‘National Health and Family Survey’- শীৰ্ষক এই সমীক্ষা পৰিচালনা কৰিছে মুম্বাইৰ ‘International Institute of Population Science’-এ । এই সমীক্ষাত প্ৰকাশ পাইছে আৰু বহু কেইটা গুৰুত্বপূৰ্ণ তথ্য।

অসমত সমান্তৰালকৈ হ্ৰাস পাইছে বন্ধ্যাকৰণো। যোৱা সমীক্ষাত মহিলাৰ ক্ষেত্ৰত এই পৰিসংখ্যা আছিল ৯.৫শতাংশ। এইবাৰ হৈছে গৈ ৯ শতাংশ। পুৰুষৰ বন্ধ্যাকৰণৰ হাৰো বৃদ্ধি  হোৱা পৰিলক্ষিত হোৱা নাই।

এই সমীক্ষাৰ বাবে ২০১৯ চনৰ জুন মাহৰ পৰা ডিচেম্বৰ মাহৰ ভিতৰত প্ৰায় ৩০ হাজাৰৰ পৰা ৩৫ হাজাৰ মহিলা আৰু ৫ হাজাৰ পুৰুষৰ মতামত গ্ৰহণ কৰা হৈছিল।

প্ৰাপ্তবয়স্ক হোৱাৰ আগতেই বিবাহপাশত আৱদ্ধ হোৱা লোকৰ সংখ্যাও বৃদ্ধি পাইছে অসমত।  ৩১.৮শতাংশ মহিলাই ১৮ বছৰ পূৰ্বেই বিবাহ পাশত আবদ্ধ হৈছে আনহাতে ২১বছৰৰ আগতেই বিয়া পতা পুৰুষৰ সংখ্যাও দ্ৰুতগতিত বৃদ্ধি পাইছে। চাৰি বছৰ পূৰ্বে তেনে পুৰুষৰ সংখ্যা আছিল ১৫শতাংশ। কিন্তু এইবাৰ এই পৰিসংখ্যা হ’লগৈ ২১.৮শতাংশ।

আনহাতে ২০১৯-২০ বৰ্ষত কন্যা সন্তান জন্মৰ সংখ্যাই পুত্ৰ সন্তানক চেৰ পেলাইছে । ২০১৯-২০ বৰ্ষত প্ৰতি ১০০০ পুত্ৰ-সন্তান জন্ম হোৱাৰ বিপৰীতে ১০১২ কন্যা-সন্তান জন্ম হৈছে অসমত।