Independence Day | ‘যিখন অসমত চৰকাৰী কৰ্মচাৰীয়ে ধনদাবী কৰে, সেইখন অসম জ্যোতি–বিষ্ণুৰ কল্পনাৰ অসম নহয়’ – খানাপাৰাত ত্ৰিৰংগাৰ তলৰ পৰা চৰকাৰী কৰ্মচাৰীক মুখ্যমন্ত্ৰীয়ে জনালে এই আহ্বান

খানাপাৰাত স্বাধীনতা দিৱসৰ কাৰ্যসূচীত চৰকাৰী কৰ্মচাৰীৰ দুৰ্নীতিৰ কথা উল্লেখ মুখ্যমন্ত্ৰী হিমন্ত বিশ্ব শৰ্মাৰ। চৰকাৰী কৰ্মচাৰীক সততা, ন্যায় আৰু সামাজিক ন্যায়ৰ প্ৰতিমূৰ্তি হ’বলৈ আহ্বান মুখ্যমন্ত্ৰীৰ। নিজৰ ভাষণত মুখ্যমন্ত্ৰীগৰাকীয়ে কয়, ‘‘যোৱা কেইটামান দিনত আমি দেখা পাইছো যে চৰকাৰী কাৰ্যালয়বোৰত দুৰ্নীতিৰ অভিযোগত টকা লৈ থাকোতে হাতে–লোটে ধৰা পৰিছে। কিহৰ টকা, কাৰোবাৰ পেঞ্চনৰ টকা, কাৰোবাৰ অনুজ্ঞাপত্ৰৰ টকা, কাৰোবাৰ ৰেচনৰ টকা। যিখন অসমত চৰকাৰী কৰ্মচাৰীয়ে মানুহক শোষণ কৰে, যিখন অসমত চৰকাৰী কৰ্মচাৰীয়ে প্ৰতিটো কথাতে ধন দাবী কৰে, সেইখন অসম জ্যোতিপ্ৰসাদৰ কল্পনাৰ অসম নহয়। সেইখন অসম বিষ্ণু ৰাভাৰ কল্পনাৰ অসম নহয়। সেই অসম গোপনীথ বৰদলৈৰ কল্পনাৰ অসম নহয়। মই অসমৰ চৰকাৰী কৰ্মচাৰীসকলক সততা, ন্যায় আৰু সামাজিক ন্যায়ৰ এক প্ৰতিমূৰ্তি হ’বলৈ এই তিৰংগ পতাকাৰ তলৰ পৰাই আহ্বান জনাইছো।’’