এখন আচৰিত দলং, গৈ থাকিলে আধাতে শেষ হৈ যায় যিখন দলং, অসমতে আছে এইখন বিশেষ দলং!

অসমৰ এখন আচৰিত দলং! যিখন দলঙেৰে গৈ থাকিলেও নৈ পাৰ হ'ব নোৱাৰে আপুনি। এই আচৰিত দলংখন আছে বঙাইগাঁও জিলাত।

বঙাইগাঁৱত দহ বছৰে সম্পূৰ্ণ নহ’ল এখন দলং ৷ জিলাখনৰ বৰঘোলাৰ পৰা কলগাছিয়া সংযোগী ৪০ কোটি ৪৪ লাখ টকা ব্যয় সাপেক্ষে নিৰ্মাণ কৰা দলংখন অৰ্ধ সম্পূৰ্ণ হৈ পৰি আছে ৷ আই নৈৰ ওপৰত নিৰ্মিয়মান দলংখনৰ দুয়োপাৰ সংযোগ নোহোৱাৰ ফলত ৰাইজৰ যাতায়ত সম্ভৱপৰ হৈ উঠা নাই ৷

বিজ্ঞান সন্মতভাৱে প্ৰতিৰোধী আঁচনি গ্ৰহণ নকৰাৰ ফলত নৈখনে গতি পথ সলনি কৰাৰ ফলত দলংখনৰ দুয়োপাৰ সংযোগ কৰাত সমস্যা আহি পৰিছে ৷ বিভাগীয় বিষয়া আৰু ঠিকাদাৰৰ মইমতালি আৰু হেমাহিৰ বাবে নিৰ্মাণ কাৰ্য সম্পূৰ্ণ হোৱাৰ পিছতো দলংখন ব্যৱহাৰৰ অনুপোযোগী হৈ পৰি আছে বুলি স্থানীয় লোকে অভিযোগ কৰিছে ৷

উল্লেখ্য যে ২০১১ চনৰ ২৩ জানুৱাৰীত তদানীন্তন মুখ্যমন্ত্ৰী তৰুণ গগৈয়ে আধাৰশিলা স্থাপন কৰি আঢ়ৈ বছৰৰ ভিতৰত নিৰ্মাণ কাৰ্য সম্পূৰ্ণ কৰাৰ প্ৰতিশ্ৰুতি দিছিল ৷ কিন্তু বিভাগীয় কৰ্তৃপক্ষৰ সুপৰিকল্পনাৰ অভাৱত এয়া ভেকোঁভাওনাত পৰিণত হৈছে ৷

বঙাইগাঁও আৰু বৰপেটা জিলা সংযোগী এই দলংখন সম্পূৰ্ণ হৈ নুঠাৰ ফলত ৰাইজে নাওৰে বিপদসংকুল যাতায়ত অব্যাহত ৰাখিবলগীয়া হৈছে ৷ আনহাতে অৰ্ধ নিৰ্মিত দলংখনৰে যান বাহনৰ চলৰচল আৰম্ভ নৌহতেই এটা অংশ তললৈ বহি যোৱাত স্থানীয় ৰাইজৰ মাজত তীব্ৰ প্ৰতিক্ৰিয়াৰ সৃষ্টি হৈছে ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।