HSLC Paper Leak: প্ৰশ্নকাকত ফাদিল কাণ্ডৰ নিত্য নতুন তথ্য, শিক্ষকৰ সমানে ছাত্ৰয়ো ভাইৰেল কৰিছিল প্ৰশ্নকাকত

নিতৌ ন ন তথ্য পোহৰলৈ আহিছে মেট্ৰিকৰ প্ৰশ্নকাকত ফাদিল কাণ্ডৰ ৷ সমান্তৰালভাৱে, আৰক্ষীৰ জালত পৰিছে এজনৰ পাছত আনজন অভিযুক্ত ছাত্ৰ, শিক্ষক ৷ উচ্চ শিক্ষা লোৱাৰ আৰম্ভণিৰ প্ৰথম পৰীক্ষা মেট্ৰিক ৷ ৰাজ্যৰ লাখ লাখ ছাত্ৰ ছাত্ৰীয়ে অতি কষ্ট, আগ্ৰহ আৰু আশাৰে বহে জীৱনৰ এই গুৰুত্বপূৰ্ণ পৰীক্ষাত ৷ কিন্তু কেইটামান টকাৰ বাবেই একাংশ শিক্ষকৰূপী দালালে সমগ্ৰ ব্যৱস্থাটোকে উপলুঙা কৰি ফাদিল কৰিছিল পৰীক্ষাৰ প্ৰশ্নকাকত ৷

চি আই ডিৰ জেৰাত মাষ্টাৰ মাইণ্ড কুমুদ ৰাজখোৱাৰ বিস্ফোৰক স্বীকাৰুক্তি ৷ বাকচৰ পৰা চুৰ কৰি উলিয়াই নিছিল প্ৰশ্নকাকত ৷ ছেবাৰ ছীল মোহৰ আতৰাই টকাৰ বিনিময়ত ভাইৰেল কৰিছিল প্ৰশ্নকাকত ৷ এই ঘটনাৰ তদন্তৰ মাজতে ৰহস্যজনকভাৱে পুনৰ ভাইৰেল হৈছিল ভূগোলৰো ভুৱা প্ৰশ্নকাকত ৷ ততাতৈয়াকৈ ছেবা কৰ্তৃপক্ষৰ স্পষ্টীকৰণ ভাইৰেল হোৱা প্ৰশ্নকাকত বিগত বৰ্ষৰ ৷

একাংশ দুষ্ট প্ৰকৃতিৰ লোকে ভাইৰেল কৰিছিল প্ৰশ্নকাকতখন ৷ তাৎক্ষণিকভাৱে আৰম্ভ হৈছিল আৰক্ষীৰ তদন্ত ৷ তদন্ত কৰিয়েই বহু জিলাত জাকে জাকে আটক কৰিছিল একাংশ ছাত্ৰক ৷ হোৱাটচএপৰ জৰিয়তে ভুৱা প্ৰশ্নকাকত ভাইৰেল কৰি আটক হ'ল বহু সংখ্যক ছাত্ৰ ৷ কি হ'ব ৰাজ্যৰ কেইবালক্ষাধিক ছাত্ৰ ছাত্ৰীৰ ভৱিষ্যত ৷ বছৰ বছৰ ধৰি পঢ়া শুনা কৰি পৰীক্ষাৰ প্ৰাকমূহুৰ্তত প্ৰশ্নকাকত ভাইৰেল হোৱাত হতভম্ব হৈ পৰিছে ছাত্ৰ ছাত্ৰীসকল ৷ প্ৰশ্ন উঠিছে ছেবাৰ বিশ্বাসযোগ্যতাকলৈও ৷ লগতে শিক্ষকৰ দৰে পবিত্ৰ বৃত্তিত নিয়োজিত হৈ দালালৰ দৰে কৰা কামক একমুখে ধিক্কাৰ দিছে সকলোৱে ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।