আজি বৰপেটাৰ বিখ্যাত দৌল যাত্ৰাৰ সুৱেৰী। পৰম্পৰাগত হোলীগীত আৰু ঘোষা কীৰ্তনেৰে মুখৰিত হৈছে সত্ৰনগৰী। বৰপেটাবাসীৰ মনত অপাৰ উছাহ।

বৰপেটা সত্ৰত আজি পালন কৰা হৈছে দৌল উৎসৱৰ সুৱেৰী। তিনিদিন ধৰি দৌল উৎসৱৰ আনন্দত মুখৰিত হৈ আছে সত্ৰনগৰী বৰপেটা। আবিৰৰ ৰং আৰু পৰম্পৰাগত হোলীগীত আৰু ঘোষা কীৰ্তনৰ মধুৰ গুঞ্জনত বৰপেটাৰ আকাশ বতাহ মুখৰিত হৈ আছে।

আজি দৌলত তোলা হ'ব কলিয়া গোসাইক। গন্ধৰ দিনা দৌলৰ পৰা নমাই অনা কলিয়া গোসাইক আজি মহা আড়ম্বৰৰ সৈতে তোলা হ'ব দৌলত। ঘুনুচা কীৰ্তন কৰি গোসাইক হেকেতা খুওৱাৰ পিছতে তোলা হ'ব দৌলত।

গোসাইক দৌলত তোলাৰ পূৰ্বে হ'ব বিখ্যাত বাঁহ ভঙা উৎসৱ। এই বাহ ভঙা উৎসৱ সম্পন্ন নোহোৱালৈ কলিয়া গোসাইক দৌলত তুলিব নোৱাৰে।

বৰপেটাবাসীৰ প্ৰাণৰ উৎসৱ দৌল যাত্ৰা চাবলৈ অসমৰে নহয় দেশৰো বিভিন্ন প্ৰান্তৰ পৰা পৰ্যটকৰ আগমন ঘটিছে।