ডিব্ৰুগড় বিজেপিৰ সংকল্প সমাৰোহ। মুখ্যমন্ত্ৰী সৰ্বানন্দ সোণোৱাল, মন্ত্ৰী হিমন্ত বিশ্ব শৰ্মাৰ লগতে বিজেপি আৰু অসম গণ পৰিষদৰ শীৰ্ষ নেতৃত্বৰ অংশগ্ৰহণ। সংকল্প সমাৰোহত কেইবা হাজাৰ লোকক উদ্দেশ্যি মন্ত্ৰী হিমন্ত বিশ্ব শৰ্মাৰ উদ্দাত্ত ভাষণ। ভাষণ প্ৰসংগত মন্ত্ৰী হিমন্ত বিশ্ব শৰ্মাই আক্ৰমণৰ লক্ষ্য কৰি লয় নাগৰিকত্ব সংশোধনী আইন বিৰোধী আন্দোলনক।
মন্ত্ৰী হিমন্ত বিশ্বৰ শৰ্মাই ভাষণ প্ৰসংগত কয় যে, ‘দিনত শ্লোগান, নিশা চান্দা তোলাৰ আন্দোলন আছিল CAA বিৰোধী আন্দোলন। দৰা-কইনাক ৰাজপথত নমাই কৰা আন্দোলন মই দেখা নাই। অসম আন্দোলনতো এনে পৰিবেশ মই দেখা নাছিলো। আন্দোলনৰ নামত বিধায়কৰ ঘৰ জ্বলাই দিব, কলাক্ষেত্ৰ আক্ৰমণ কৰিব সেয়া কেনে ধৰণৰ আন্দোলন?’
মন্ত্ৰী শৰ্মাই সভাত বহু প্ৰতিশ্ৰুতিও দিয়ে। চলিত কাৰ্যকালত চৰকাৰে কি কি কাম কৰিলে, বা আগন্তুক এবছৰত কি কি কাম কৰিব, তাৰ এক খতিয়ানো দাঙি ধৰে মন্ত্ৰী হিমন্ত বিশ্ব শৰ্মাই।
কিন্তু সভাত ৰাজ্যৰ সৰ্বস্তৰৰ ৰাইজে অংশগ্ৰহণ কৰা নাগৰিকত্ব সংশোধনী আইন বিৰোধী আন্দোলনক তুচ্ছ–তাচ্ছিল্য কৰি কেৱল চান্দা তোলাৰ আন্দোলন বুলি কৰা মন্তব্য এতিয়া CAA বিৰোধী ৰাইজে কিদৰে গ্ৰহণ কৰে সেয়া হ’ব লক্ষ্যণীয়।
Published by:Himangshu Bhuyan
First published:
অসমীয়াত ব্ৰেকিং নিউজ সৰ্বপ্ৰথম News18 অসমীয়াত| শেহতীয়া খবৰ, লাইভ নিউজ আপডেট. সবাতোকৈ বিশ্বাসযোগ্য অসমীয়া নিউজ ৱেবছাইট News18 অসমীয়া|