‘বিপিএফ এতিয়া পাম যোৱা চকা, আগতে বিজেপিয়ে পাম দি আছিল, এতিয়া বন্ধ কৰিছে’

ডিচেম্বৰৰ ১৫ তাৰিখৰ ভিতৰত বিটিচিত পৰিষদীয় নিৰ্বাচন অনুষ্ঠিত হোৱালৈ চাই বৰ্তমান নিৰ্বাচনী বতাহ ক্ৰমাৎ গৰম হৈ উঠিছে। কোকৰাঝাৰ জিলাৰ গোসাঁইগাঁও মহকুমাৰ সদৰ চহৰৰ গোসাঁইগাঁও উচ্চতৰ মাধ্যমিক বিদ্যালয় খেল পথাৰত আজি অনুষ্ঠিত হয় বিজেপিৰ এখন বিশাল নিৰ্বাচনী জনসভা৷

বাকযুদ্ধৰে ক্ৰমাৎ বিটিআৰৰ নিৰ্বাচনী বতাহ গৰম হৈ উঠাৰ সময়তে আজি ৰাজ্যৰ অন্যতম প্ৰভাৱশালী শিক্ষা, স্বাস্থ্য তথা বিত্ত মন্ত্ৰী ড০ হিমন্ত বিশ্ব শৰ্মাৰ সদম্ভ ঘোষণা – বিগত পোন্ধৰটা বছৰে উন্নয়নৰ পুঁজি আত্মসাৎ কৰি ৰাইজক বঞ্চনা কৰা বিপিএফ এইবাৰ উৎখাত হ’বই৷

ইমান বছৰে বিটিচিত শাসন চলোৱা হাগ্ৰামা মহিলাৰী নেতৃত্বাধীন বিপিএফে সকলো জাতি–জনগোষ্ঠীৰ সম অধিকাৰ, সম বিতৰণ আৰু সম উন্নয়নৰ নামত দুৰ্নীতিৰ পাহাৰ গঢ়িলে৷ জবকাৰ্ডৰ নামত, বৃদ্ধ আৰু বিধৱাসকলৰ পেঞ্চনৰ নামত, প্ৰধানমন্ত্ৰী গ্ৰাম্য আৱাস যোজনাৰ নামত, আত্মসহায়ক গোটৰ নামত, ম্যাদি পট্টা প্ৰদান, চৰকাৰী চাকৰি প্ৰদান আদি সকলোতে টকা উৎকোচ নিদিলেই নহয়৷ বিটিআৰৰ নিৰ্বাচনী প্ৰচাৰ সময়ত এই কথা উল্লেখ কৰে হিমন্ত বিশ্ব শৰ্মা।

শৰ্মাই কয় – বিপিএফ এতিয়া পাম যোৱা চকা। ইমানদিনে বিজেপিয়ে পাম দি আছিল। এতিয়া বিজেপিয়ে চকাত পাম দিয়া বন্ধ কৰিছে। এতিয়া বিপিএফৰ কাম নাই। দিল্লীৰ পৰা সাধাৰণ মানুহৰ বাবে অহা সুযোগ–সুবিধা মাজতে বিপিএফে মেকুৰীৰ দৰে খাই দিয়ে। বিপিএফ মেকুৰী নেকি বুলি কটাক্ষ কৰে মন্ত্ৰী হিমন্ত বিশ্ব শৰ্মাই।