বদৰুদ্দিন আজমলৰ ভৰি চেলেকিব...অজিত ভূঞা–জগদীশ ভূঞাক বদনৰ সৈতে ৰিজালে মন্ত্ৰী হিমন্ত বিশ্ব শৰ্মাই!

দুদিনীয়া কাৰ্যসূচীৰে আজিৰে পৰা ধেমাজি ৰাজহুৱা প্ৰেক্ষাগৃহত অনুষ্ঠিত হৈছে বিজেপিৰ অনান্য পিছপৰা শ্ৰেনী মৰ্চা ৰাজ্যিক কাৰ্যনিৰ্বাহক সভা ৷ পতাকা উত্তোলন,বন্তি প্ৰজ্বলনৰে আৰম্ভ হোৱা এই কাৰ্যনিৰ্বাহক সভাত উদ্বোধক হিচাবে উপস্থিত থকা নেডাৰ আহ্বায়ক হিমন্ত বিশ্বৰ মুখত পুনৰবাৰ শৰাইঘাটৰ প্ৰসংগ !

বিজেপিৰ অবিচি মৰ্চাৰ ৰাজ্যিক কাৰ্যনিৰ্বাহকত বক্তৃতা  প্ৰদান কৰি সাংসদ অজিত ভূঞাৰ বিৰুদ্ধে সমালোচনাত সৰৱ হৈ পৰে মন্ত্ৰী ডঃ শর্মা। সমালোচনা কৰে এজেপিৰ জগদীশ ভূঞাকো। এনে ব্যক্তিয়েই বদৰুদ্দিন আজমলৰ ভৰি চেলেকা পৰিলক্ষিত হোৱাৰ সময় আহি পৰিল বুলি কটাক্ষ কৰে শৰ্মাই ৷

অবিচি মৰ্চাৰ কাৰ্যনিৰ্বাহকত প্ৰতিনিধি সকলৰ সন্মুখত হিমন্ত বিশ্ব শৰ্মাই উত্তৰ অসমৰ দুৱাৰ মুখত আমাৰ সভ্যতা ধ্বংস কৰিব খোজা সকল আহি পালে বুলি মন্তব্য কৰে ৷



অসমৰ জনজাতি সকল আৰু জনজাতি সকলক লগত বিজেপি দল আগবাঢ়ি যাব বুলি উল্লেখ কৰি ২০২১ৰ নিৰ্বাচনত বিজেপিৰ প্ৰতিজন কৰ্মকৰ্তা শৰাইঘাটৰ যুদ্ধৰ  ৰণুৱা ঘোঁৰাৰ দৰে হ’ব লাগিব মন্তব্য কৰে ৷
ধেমাজিৰ ৰাজহুৱা প্ৰেক্ষাগৃহত অনুষ্ঠিত হোৱা  বিজেপিৰ অবিচি  মৰ্চাৰ ৰাজ্যিক কাৰ্যনিৰ্বাহকত সভাপতি ৰঞ্জিত দাস , গ্ৰামোন্নয়ন মন্ত্ৰী নৱ দলেকে আদি কৰি বিজেপি বহুকেইগৰাকী ৰাজ্যিক নেতা উপস্থিত থাকে।