পৌৰসভাৰ নিৰ্বাচনত দলৰ উৰ্দ্ধত ভাল লোকক প্ৰাৰ্থিত্ব দিয়ক ! মুখ্যমন্ত্ৰীৰ আহ্বানক লৈ শাসক-বিৰোধীত ব্যাপক চৰ্চা ...

৬ মাৰ্চত অনুষ্ঠিত হ'বলগীয়া ৰাজ্যৰ ৮০খন পৌৰসভাৰ নিৰ্বাচনত মুখ্যমন্ত্ৰীয়ে আহ্বান জনোৱাৰ দৰে দলৰ উৰ্দ্ধত গৈ সকলো দলে স্থানীয় ভাল লোকক প্ৰাৰ্থীত্ব দিবনে? বিষয়টো এতিয়া ৰাজ্যৰ সকলো দলৰ মজিয়াত চৰ্চাৰ বিষয় ৷ লগতে আসন্ন পৌৰসভাৰ নিৰ্বাচনত BJP-AGPৰ মাজত বাহাল থাকিব বন্ধুত্ব তথা মিত্ৰতা ৷

“পৌৰসভাৰ নিৰ্বাচনত ভাল মানুহক প্ৰাৰ্থীত্ব দিয়ক ৷ দলৰ উৰ্দ্ধত গৈ সকলো দলে ভাল মানুহক দিয়ক টিকট”- ড° হিমন্ত বিশ্ব শৰ্মা ৷

মুখ্যমন্ত্ৰীৰ এই আহ্বান এতিয়া চৰ্চাৰ বিষয় ৷ লগতে চৰ্চা চলিছে পূৰ্বে কি ভাল মানুহক দিয়া হোৱা নাছিল নেকি টিকট?

এই সন্দৰ্ভত বিৰোধী কংগ্ৰেছৰ বিধায়ক তথা প্ৰদেশ কংগ্ৰেছৰ কাৰ্যকৰী সভাপতি জাকিৰ হুছেইন শিকদাৰে ক'লে- “প্ৰধানমন্ত্ৰী, মুখ্যমন্ত্ৰীৰ পৰা সকলো পদতে ভাল মানুহ অধিস্থিত হ'ব লাগে ৷ দাগী-অপৰাধীক কোনেও নিবিচাৰে ৷”

লগতে জাকিৰ হুছেইন শিকদাৰে ক'লে- “শাসনত থকা BJPয়ে প্ৰথমে ভাল মানুহক টিকট দি বাট দেখুওৱাক ৷”

ৰাইজৰ হৈ কাম কৰিব বিচৰা, দলৰ উৰ্দ্ধত থাকিব বিচৰা ভাল মানুহক পৌৰসভা, পৌৰ নিগম বা পঞ্চায়তত টিকট দিয়াৰ বাবে মুখ্যমন্ত্ৰীয়ে জনোৱা আহ্বানক সহাৰি জনালে মন্ত্ৰী তথা AGPৰ সভাপতি অতুল বৰাই ৷

ইপিনে আসন্ন পৌৰসভাৰ নিৰ্বাচনত শাসকীয় মিত্ৰজোঁট BJP আৰু AGPৰ মাজত মিত্ৰতা থাকিব বুলি সদৰি কৰিলে AGPৰ সভাপতি অতুল বৰাই ৷

পৌৰসভাৰ নিৰ্বাচনত AGPৰে মিত্ৰতা থাকিব বুলি স্পষ্ট কৰিলে BJPৰ ৰাজ্যিক সভাপতি ভৱেশ কলিতাই ৷