ধুবুৰীত হাই-মাদ্ৰাছা পৰীক্ষাৰ প্ৰশ্নকাকত ফাদিল হোৱাৰ অভিযোগ, পৰীক্ষা অনুষ্ঠিত হোৱাৰ এঘণ্টাৰ ভিতৰতে মোবাইলে মোবাইলে বিয়পিল প্ৰশ্নকাকত

হাই মাদ্ৰাছা পৰীক্ষাত প্ৰশ্নকাকত ফাদিলৰ গুৰুতৰ অভিযোগ উত্থাপিত হৈছে। পৰীক্ষা অনুষ্ঠিত হোৱাৰ এঘণ্টাৰ ভিতৰতে ফাদিল হৈছে হাই মাদ্ৰাছাৰ প্ৰশ্নকাকত। ধুবুৰীৰ গৌৰীপুৰৰ এখন বিদ্যালয়ত সংঘটিত হৈছে এই ঘটনা। অঞ্চলটোৰ মদিনাতুল উলুম হাই-মাদ্ৰাছাত প্ৰশ্নকাকত ফাদিল হোৱাৰ অভিযোগত ইতিমধ্যে আৰক্ষীয়ে আটক কৰিছে এজন লোকক। আৰু আটক কৰা লোকজন বিদ্যালয়খনৰ পৰিচালনা সমিতিৰ সদস্য বুলি জানিব পৰা গৈছে।

উল্লেখ্য যে, পৰীক্ষা অনুষ্ঠিত হোৱাৰ কিছু সময়ৰ পিছতে মোবাইলে মোবাইলে বিয়পি পৰে প্ৰশ্নকাকতখন। আনকি ফাদিল হোৱা প্ৰশ্নকাকত লৈ একাংশ অভিভাৱক বিদ্যালয়ৰ চৌহদৰ আশে পাশে বহি লয়। পিছত উত্তৰ কৰি কাগজৰ টুকুৰাত লিখি ৱাল পাৰ হৈ খিৰিকীয়ে পৰীক্ষাৰ্থীক যোগান ধৰা বুলিও একাংশই অভিযোগ কৰিছে।



পিছে প্ৰশ্ন কাকতখন চলিত বৰ্ষৰে নে পুৰণি সেইলৈ এতিয়াও নিশ্চিত হোৱা নাই আৰক্ষী তথা শিক্ষা বিভাগৰ লোক। ঘটনাৰ সন্দৰ্ভত তদন্ত অব্যহত ৰাখিছে আৰক্ষীয়ে।