Happy Birthday Zubeen: আজি জুবিন গাৰ্গৰ জন্মদিন, বিভিন্ন প্ৰান্তত অনুৰাগীয়ে আয়োজন কৰিছে বিভিন্ন অনুষ্ঠান

আজি জুবিন গাৰ্গৰ জন্মদিন। প্ৰত্যেক বছৰৰ দৰে এইবাৰো অসমৰ জনপ্রিয় কন্ঠশিল্পী জুবিন গাৰ্গৰ জন্মদিন উপলক্ষে কিছু ব্যতিক্রমী পদক্ষেপ গ্ৰহণ কৰা হৈছে। বুধবাৰে গুৱাহাটী মহানগৰীৰ আয়ুৰচুন্দ্ৰা হাস্পতালত জনপ্ৰিয় শিল্পীগৰাকীৰ প্ৰাক জন্মদিনৰ আয়োজন কৰা হয়।

চুপাৰস্পিচিয়েলিটি হাস্পতালখনৰ কৰ্তৃপক্ষই বৃদ্ধাশ্ৰমৰ বয়স্ক লোকসকলক বিনামূলীয়া স্বাস্থ্য পৰীক্ষা শিবিৰৰ আয়োজন কৰাৰ লগতে স্বাস্থ্য কৰ্মীসকলৰ মাজত খাদ্য সামগ্ৰী বিতৰন কৰে। লগতে উক্ত স্বাস্থ্য পৰীক্ষা শিবিৰত এক ৰক্তদান শিবিৰৰো আৰম্ভনি কৰা হয়।



পিছত জুবিন গাৰ্গে সংবাদমেল সম্বোধন কৰি তেওঁৰ বহু নতুন পৰিকল্পনাৰ কথা জানিবলৈ দিয়ে। শিল্পীগৰাকীয়ে বৰ্তমান এটা মিউজিক কোম্পানী ক্ৰিয়েট কৰাৰ চিন্তা কৰা বুলি জানিবলৈ দিয়ে। লগতে অসমীয়া ছবিৰ উত্তৰণৰ বাবে আগন্তুক বছৰত লক্ষ্য নিৰ্ধাৰণ কৰিছে জুবিনে। ২০২২ বৰ্ষতে জুবিন গাৰ্গৰ ৰাজনীতি আৰু ড০ বেজবৰুৱা২ নামৰ দুখন ছবিয়ে মুক্তি লাভ কৰিব। সেইদৰে এখন নতুন ছবিৰো পৰিকল্পনা কৰিছে শিল্পীগৰাকীয়ে।

ইফালে জন্মদিনৰ দিনটোত ৰাজ্যৰ বিভিন্ন প্ৰান্তত জুবিন গাৰ্গ ফেন ক্লাৱে বিভিন্ন অনুষ্ঠানৰ আয়োজন কৰিছে। সাংস্কৃতিক সন্ধিয়া, ৰক্তদান শিবিৰ, দুৰ্গতজনলৈ সহায়ৰ হাত আগবঢ়োৱা আদি বিভিন্ন কাৰ্যসূচী ৰাখিছে অনুৰাগীসকলে।