Lok Sabha Elections 2024: প্ৰাৰ্থীত্বকেন্দ্ৰীক যুঁজ আৰম্ভ, গুৱাহাটীত কোনে পাব বিজেপিৰ টিকট?

লোকসভা নিৰ্বাচনলৈ সাজু হৈছে শাসকীয় বিজেপি ৷ সোমবাৰে দলটোৰ ৩৯খন সাংগঠনিক জিলাতে অনুষ্ঠিত হ'ল কাৰ্যনিৰ্বাহক বৈঠক ৷ মহা জনসম্পৰ্ক অভিযান দলটোৱে কিদৰে কৰিব, ১৪টা লোকসভাত কিদৰে হ'ব ১৪খন জনসভা তাৰ ৰূপৰেখা প্ৰস্তুত কৰিছে দলটোৱে ৷ ইয়াৰ মাজতে গুৱাহাটী লোকসভা সমষ্টিত আৰম্ভ হৈছে প্ৰাৰ্থীত্বকেন্দ্ৰীক শীতল যুঁজ ৷

চৰ্চা আৰম্ভ হৈ গৈছে৷ গুৱাহাটীৰ ভোটাৰৰ মুখে মুখে এতিয়া কথাবোৰ ৷ প্ৰত্যাহ্বানৰ সন্মুখীন হ'ব সাংসদ কুইন ওজা ৷ পুনৰ দলীয় টিকট লাভ কৰিবনে কুইন ওজাই? ভোটাৰৰ মনত পাকখাই থকা এই প্ৰশ্নটোকে সোধা হৈছিল সাংসদ ওজাক ৷ এই প্ৰশ্নৰ উত্তৰত কুইন ওজাই ক'লে, "আমাৰ টাৰ্গেট ১২+। আমাৰ লক্ষ্য নৰেন্দ্ৰ মোদীক পুনৰ প্ৰধান মন্ত্ৰী পতা। দলটোত আমি কাৰ্যকৰ্তা, সদায় কাৰ্যকৰ্তা হৈ থাকি ভাল পাম ৷ বেলেগে টিকট বিচাৰিব পাৰে ৷  সকলোৰে অধিকাৰ আছে । বেলেগে টিকট পোৱাক লৈ মই আক্ষেপ কৰিমনে নকৰিম সেয়া সময়ে ক'ব । মই কি কৰিছোঁ সকলোৱে দেখিছে । ভাল কৰিছোঁ নে বেয়া কৰিছোঁ আপোনালোকেও চাব পাৰে ৷"

কুইন ওজাই কৈছে তেওঁ হেনো কাৰ্যকৰ্তা হৈ থাকিবলৈকে ভাল পাব ৷ অতি ধৈৰ্যৰে সাংসদ ওজাই নিজে কৰা কাম সাংবাদিকক চাবলৈ কৈ উত্তৰটো দিলেও আপাতত ধৰিব পাৰি সাংসদ কুইন ওজাৰ ভিতৰৰ জুইকুৰাক ৷ সাংসদ ওজাৰ এই অৱস্থাৰ মূলতে হ’ল জয়ন্ত দাস, আঙুৰলতা ডেকা, ৰমেন ডেকা, দিলীপ শইকীয়া আদি ৷ গুৱাহাটীৰ টিকট বিচাৰিব নে নাই সেই সন্দৰ্ভত আঙুৰলতা ডেকা নিশ্চুপ ৷

সংবাদমাধ্যমৰ পৰা কৌশলৰে আঁতৰি আছে আঙুৰলতা ডেকা ৷ লতাশিলত বিহুৰ সময়ৰ এটা অনুষ্ঠানৰ পিছৰে পৰা একপ্ৰকাৰ হাইলাইটত নাই আঙুৰলতা ডেকা ৷ অফ কেমেৰাত আঙুৰলতাই কৈ থৈছে চিকাৰৰ পূৰ্বে এখোজ পিছুৱাই আহে বাঘো ৷ হয়তো দলীয় কোনো নেতাৰ নিৰ্দেশতে নিশ্চুপ আঙুৰলতা ৷ কিন্তু নিশ্চুপ হৈ থাকিলেও আঙুৰলতা ডেকাই গুৱাহাটীৰ টিকট বিচাৰি যথাস্থানত চাপ ইতিমধ্যেই সৃষ্টি কৰিছে ৷

গুৱাহাটীৰ টিকটৰ দৌৰত নিজৰ নাম ৰাখিবলৈ তৎপৰতা অব্যাহত ৰাখিছে প্ৰাক্তন সাংসদ ৰমেন ডেকা, মঙলদৈৰ বৰ্তমানৰ সাংসদ তথা দলটোৰ ৰাষ্ট্ৰীয় সাধাৰণ সম্পাদক দিলীপ শইকীয়াইও ৷ আনহাতে অসম বিজেপিৰ এগৰাকী অন্যতম পুৰণি কৰ্মী তথা একালৰ যুৱ মৰ্চাৰ সভাপতি জয়ন্ত দাসে বিচাৰিব গুৱাহাটী লোকসভাৰ টিকট ৷ গুৱাহাটীৰ টিকট হেনো জয়ন্ত দাসৰ অধিকাৰ ৷ দাসে মুকলিকৈ একো কোৱা নাই৷ কিন্তু নক'লেও আকাৰে ইংগিতেৰে বুজাই দিছে গুৱাহাটীৰ টিকট জয়ন্ত দাসক লাগিব, টিকট পোৱাটো অধিকাৰ ৷ বিজেপিয়ে ১৪টা লোকসভা সমষ্টিত ১৪খন জনসভা কৰিব, সমানে সমানে বিজেপিৰ চলিব মহা জনসম্পৰ্ক অভিযান ৷ সোমবাৰে বিজেপিৰ ৩৯খন জিলাতে অনুষ্ঠিত হ'ল কাৰ্যনিৰ্বাহক ৷ হেঙেৰাবাৰীত মহানগৰ জিলা বিজেপিৰ কাৰ্যনিৰ্বাহকত উপস্থিত আছিল এইসকল নেতা ৷ স্পষ্ট কথা, খেল আৰম্ভ হৈ গৈছে ৷ গুৱাহাটীৰ টিকটক লৈ আৰম্ভ হোৱা যুঁজখন ক্ৰমশ ৰোমাঞ্চকৰ হৈ গৈ আছে ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।