গুৱাহাটী বিশ্ববিদ্যালয়তো ভয়ংকৰ ৰেগিং! স্নাতকোত্তৰৰ ভুক্তভোগী ছাত্ৰই আনিছে অভিযোগ

এইবাৰ গুৱাহাটী বিশ্ববিদ্যালয়তো ৰেগিং সংঘটিত হোৱাৰ ভয়ংকৰ অভিযোগ উত্থাপিত হৈছে। বিশ্ববিদ্যালয়ৰ ড° বাণীকান্ত কাকতি তিনি মহলীয়া ছাত্ৰাবাসত উত্থাপিত হৈছে ৰেগিংৰ অভিযোগ।

উল্লেখযোগ্য যে, ৰেগিঙৰ অভিযোগ আনিছে হজৰত আলী নামৰ এগৰাকী ছাত্ৰই। ভুক্তভোগী হজৰত আলীৰ ঘৰ গোৱালপাৰাত বুলি জানিব পৰা গৈছে। ২০২১ বৰ্ষৰ আৰৱী বিষয়ৰ স্নাতকোত্তৰ ছাত্ৰ আছিল হজৰত।

হজৰত আলীয়ে অভিযোগ কৰা অনুসৰি, জ্যেষ্ঠ ছাত্ৰই সুৰাপান কৰি কৰা নিৰ্মম প্ৰহাৰৰ বলি হৈছিল তেওঁ। ২৭ মাৰ্চৰ নিশা সংঘটিত হোৱা এই ৰেগিঙত জ্যেষ্ঠ ছাত্ৰৰ চৰত কাণৰ পৰ্দা ফাটি গৈছিল হজৰত আলীৰ।

কিন্তু এই ৰেগিঙৰ অভিযোগ নাকচ কৰে বিশ্ববিদ্যালয়ৰ ড° বাণীকান্ত কাকতি তিনি মহলীয়া ছাত্ৰাবাসৰ জুনিয়ৰ ছাত্ৰসকলে। ছাত্ৰসকলে স্পষ্টকৈ জানিব দিয়ে যে হজৰত আলিৰ এই অভিযোগ সম্পূৰ্ণ ৰূপে মিছা আৰু বিশ্ববিদ্যালয়ত কোনো ধৰণৰ ৰেগিং সংঘটিত নহয়।

খবৰ অনুসৰি, হজৰত আলিয়ে ব্যক্তিগত কাজিয়াক ৰেগিঙৰ ৰূপ দিয়া বুলি জানিব দিয়ে গুৱাহাটী বিশ্ববিদ্যালয়ৰ ড° বাণীকান্ত কাকতি তিনি মহলীয়া ছাত্ৰাবাসৰ ছাত্ৰসকলে। হজৰত আলিয়ে ২০২২ বৰ্ষৰ জুলাই মাহতে ছাত্ৰাবাস এৰিছিল।