জি এছ ৰোডত মুক্ত বিচৰণ কৰা হাতীটো আঘাতপ্ৰাপ্ত। বন্যহস্তীৰ জাকৰ আক্ৰমণত হৈছিল আহত।

মুখ্যপৃষ্ঠা »খবৰ »অসম »জি এছ ৰোডত মুক্ত বিচৰণ কৰা হাতীটো আঘাতপ্ৰাপ্ত। বন্যহস্তীৰ জাকৰ আক্ৰমণত হৈছিল আহত।

আমচাং অভয়াৰণ্যৰ পৰা নামি অহা প্রায় ৩০টা বনৰীয়া হাতীৰ জাক এটাই অকলশৰীয়া হাটীটোক আক্ৰমণ কৰি গুৰুতৰ ভাবে আঘাতপ্ৰাপ্ত কৰে বুলি বন কৰ্মীয়ে জনাইছে।

News18 Assam
Last Updated : June 14, 2021, 14:52 IST

Ajoy Barman

গুৱাহাটীৰ জি এছ ৰোডত মুক্ত বিচৰণ কৰা হাতীটো আঘাতপ্ৰাপ্ত। গুৱাহাটীৰ সাতগাঁও থানাৰ অন্তৰ্গত অমচাং যোৰাবাটৰ আশ্ৰম বস্তিত সংঘটিত হাতীৰ দলবদ্ধ আক্ৰমণত আহত হয় জি এছ ৰোডত বিচৰণ কৰি থকা হাতীটো। বনৰীয়া হাতীৰ চোকা দাঁতৰ আক্ৰমণত হাতীটোৱে সোঁ ভৰিত আঘাত পায়। ফলত সোঁঁ ভৰিত প্ৰকাণ্ড গাতৰ সৃষ্টি হৈছে।

অমচাং অভয়াৰণ্যৰ ১২ বছৰীয়া এটা হাতী অলপতে গুৱাহাটীৰ জি এছ ৰোডত মুক্ত বিচৰণ কৰা দেখা গৈছিল। হাতীটোক বন বিভাগে কৰায়ত্ত কৰি পুনৰ আমচাং অভয়াৰণ্যত মুকলি কৰি দিছিল। তেতিয়াৰে পৰা হাতীটোৱে আমচাং অভয়াৰণ্যৰ পৰা সাতগাঁও অঞ্চলত মুক্ত বিচৰণ কৰি আছিল।

তিনিদিন পূর্বে আমচাং অভয়াৰণ্যৰ পৰা পুনৰ নামি অহা প্রায় ৩০টা বনৰীয়া হাতীৰ জাকৰ লগত এই হাটীটোৱে চামিল হব বিচৰে। কিন্তু বন্য হস্তীৰ জাকটোৱে ওলোটাকৈ অকলশৰীয়া হাটীটোক আক্ৰমণ কৰি গুৰুতৰ ভাবে আঘাতপ্ৰাপ্ত কৰে বুলি বন কৰ্মীয়ে জানিবলৈ দিয়ে।

ইয়াৰ পাছৰে পৰা বনকৰ্মীয়ে অৰ্থাৎ দেওবাৰে নিশাৰ পৰা হাতীটোক তদাৰক কৰি আছিল। হাতীটো চলা-ফুৰা কৰিব নোৱৰাত বন কৰ্মীয়ে ৰাজ্যিক চিৰিয়াখানা কৰ্তৃপক্ষৰ লগত যোগাযোগ কৰে। ইয়াৰ পিছতে চিৰিয়াখানাৰ পৰা অহা এটা চিকিৎসকৰ দলে আঘাতপ্ৰাপ্ত হাতীটোক চিকিৎসা সেৱা আগবঢ়াই আছে।.