Guwahati News: স্মাৰ্ট চিটীৰ নামত ভেকোভাওনা, গুৱাহাটীত পথৰ জৰাজীৰ্ণ অৱস্থা

গুৱাহাটী, ১৮ মে’: নেতাৰ মুখত উন্নয়নৰ কথা আখৈ ফুটা দি ফুটে ৷ কিন্তু স্মাৰ্ট চিটী কৰিবলৈ লোৱা গুৱাহাটীৰ উন্নয়নৰ নামত চলিছে প্ৰশাসনৰ ভেকোভাওনা । কেতবোৰ গ্ৰামাঞ্চলত বাট-পথৰ দুৰৱস্থাৰ ছবি দেখি আপুনিয়ো কৈছিল বা ভাবিছিল উন্নয়ন সচাঁকৈয়ে হৈছেনে ?

কাৰণ গাঁৱত সংবাদমাধ্যমৰ কেমেৰাৰ সন্মুখত পথৰ ওপৰত ভুই ৰুই প্ৰতিবাদ সাব্যস্ত কৰি সাধাৰণ জনতাই পথৰ দুৰৱস্থা জনপ্ৰতিনিধি তথা চৰকাৰৰ দৃষ্টিত পেলাইছিল। কিন্তু তেনে দুৰৱস্থা নগৰত হ’লে ? হয়, গুৱাহাটীৰ মহানগৰীৰ কথাকেই কৈছো । গুৱাহাটীত পথৰ নামত আপুনিও দেখিব পাৰে পুখুৰী ।

এইটো বেলতলাৰ পৰা ৰুক্মিনীগাঁও অভিমুখে যাব পৰা পথ । যিটো পথে সংযোগ কৰে জি এছ ৰোডকো । পথটোৰ দুৰৱস্থা দেখি আপুনি অনুমান কৰিব পাৰিব সচাঁকৈয়ে এয়া স্মাৰ্ট চিটীয়েনে ? পুখুৰী সদৃশ গাঁততেই প্ৰমাণ হয় মহানগৰীৰ উন্নয়ন ।

এই পথেৰেই ৰাজ্যৰ ভিন্ন প্ৰান্তৰ লোকে আহ যাহ কৰে সাধাৰণ জনজাতি আৰু পিছপৰা শ্ৰেণীৰ কল্যাণ সঞ্চালকালয়লৈ ৷ কাষতে লাগি আছে এইটো সাধাৰণ জনজাতি আৰু পিছপৰা শ্ৰেণীৰ কল্যাণ সঞ্চালকালয় আৰু সন্মুখত পুখুৰীসদৃশ গাঁত ।

প্ৰশাসন বা নেতাই যিমান উন্নয়নৰ কথা ক’লেও যেন দৃশ্যসমূহে উন্নয়নৰ ফোপোলা স্বৰূপটোহে দেখুৱাই দিছে ।