নিৰ্ধাৰিত ৯০ দিনৰ ভিতৰত চাজশ্বিট দাখিল নকৰাৰ বাবে জামিন পালে দুৰ্নীতিগ্ৰস্থ ACS চাইবৰ ৰহমানে৷ মুখ্যমন্ত্ৰীৰ বিশেষ তদাৰকী কোষে চাৰ্জশ্বিট দাখিল কৰাৰ দিনাই উচ্চ ন্যায়ালয়ে জামিন মঞ্জুৰ কৰিলে চাইবৰ ৰহমানৰ৷
আয়তকৈ অধিক সম্পত্তিৰ পাহাৰ গঢ়ি গ্ৰেপ্তাৰ হোৱা এচিএছ বিষয়া চাইবৰ ৰহমানে এটা গোচৰত জামিন লাভ কৰিলে গুৱাহাটী উচ্চ ন্যায়ালয়ৰ পৰা৷ ন্যায়ালয়ে নিৰ্ধাৰিত ৯০ দিনৰ ভিতৰত চিএম ভিজিলেঞ্চে আদালতত চাৰ্জশ্বিট নিদিয়াৰ বাবে জামিন দিলে চাইবৰ ৰহমানক৷
মঙলবাৰে চিএম ভিজিলেঞ্চে চাইবৰ ৰহমানৰ বিৰুদ্ধে ৯২ পৃষ্ঠাজোৰা চাৰ্জশ্বিট দাখিল কৰিছিল যদিও উচ্চ ন্যায়ালয়ে নিৰ্ধাৰিত সময়ত চাৰ্জশ্বিট নিদিয়াৰ বাবে জামিন প্ৰদান কৰে চাইবৰক৷ চাৰ্জশ্বিটত চাইবৰ ৰহমানৰ সম্পত্তিৰ তথ্য উল্লেখ কৰে আৰক্ষীয়ে৷ তদন্তত আৰক্ষীয়ে ১০৪টা স্থানত নামে–বেনামে মাটি–সম্পত্তিৰ তথ্য লাভ কৰিছে৷
চিএম ভিজিলেঞ্চে চাইবৰ ৰহমানৰ বিৰুদ্ধে দুটা গোচৰ ৰুজু কৰিছিল৷ প্ৰথমটো গোচৰ আছিল আয়তকৈ অধিক সম্পত্তিৰ গোচৰ আৰু দ্বিতীয়টো গোচৰ গাঁওবুঢ়া নিযুক্তি কেলেংকাৰী৷ প্ৰথম গোচৰটোত আদালতে জামিন দিছে যদিও দ্বিতীয় গোচৰটোত আদালতে জামিনৰ সন্দৰ্ভত শুনানি গ্ৰহন কৰি আছে৷ আনহাতে চিএম ভিজিলেঞ্চৰ আৰক্ষী অধীক্ষক ৰ’জী কলিতাই জামিন সন্দৰ্ভত মুখ খুলিব বিচৰা নাই যদিও চাৰ্জশ্বিট সময়মতে দিয়া বুলি দাবী কৰে৷
আনহাতে জ্যেষ্ঠ অধিবক্তা বিজন মহাজনে কি কাৰণত চাইবৰ ৰহমানে জামিন লাভ কৰিবলৈ সক্ষম হ’ল তাৰ ওপৰত আইনী প্ৰক্ৰিয়াৰ ওপৰত মন্তব্য কৰে৷ অধিবক্তাগৰাকীয়ে কোনো ধাৰাত যদি যাৱজ্জীৱন কাৰাদণ্ড, ফাঁচি হয় বা ১০ বছৰৰ অধিক কাৰাদণ্ডৰ বিধান আছে, সেইসমূহ গোচৰৰ চাৰ্জশ্বিট বা পুলিচ ৰিৰ্প’ট ৯০ দিনৰ ভিতৰত নিদিলে আদলতে জামিন দিবলৈ বাধ্য হয়৷ আৰক্ষীয়ে সময়মতে চাৰ্জশ্বিট দিব নোৱাৰাৰ বাবে চাইবৰ ৰহমানে জামিন লাভ কৰাৰ ঘটনাই আৰক্ষীৰ তদন্ত প্ৰক্ৰিয়াৰ ওপৰত প্ৰশ্ন উত্থাপন হৈছে৷ নিৰ্ধাৰিত ৯০ দিনৰ ভিতৰত চাৰ্জশ্বিট দাখিল নকৰাৰ বাবে জামিন পালে দুৰ্নীতিগ্ৰস্থ ACS চাইবৰ ৰহমানে৷
Published by: Sanjay Kumar Das
FIRST PUBLISHED : November 23, 2021, 16:36 IST
অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।