অসমতো আৰম্ভ হ'ল পৰিৱেশ অনুকূল জীৱনযাপনৰ বাবে 'মিছন লাইফ' ...

প্ৰধানমন্ত্ৰী নৰেন্দ্ৰ মোদীৰ নেতৃত্বত চলোৱা এক বিশ্বব্যাপী গণ আন্দোলনৰ নাম 'মিছন লাইফ' ৷ এই আন্দোলনৰ অংশীদাৰ হ'ল অসমো ৷ অসমতো আৰম্ভ হ'ল 'Mission Life'।

মিছন লাইফক দ্ৰুতৰূপ দিবলৈ চৰকাৰেও সামৰি লৈছে 'সেউজ বাজেট' ৷ গ্লাছগ' সন্মিলন ইজিপ্তৰ সন্মিলনৰ পিছত প্ৰধানমন্ত্ৰী নৰেন্দ্ৰ মোদীয়ে যোৱা ২০অক্টোবৰত দেশৰ বাবে আৰম্ভ কৰিছিল 'মিছন লাইফ'ৰ ৷ মিছন লাইফ মূলতঃ পৰিৱেশ অনুকূলে জীৱনচৰ্চা ৷ প্ৰধানমন্ত্ৰী মোদীয়ে দেশত আৰম্ভ কৰা এই পৰিৱেশ অনুকূল জীৱনচৰ্চাৰ আন্দোলনক অসমত গতি দিবলৈ ৰাজ্য চৰকাৰৰ বাজেটত অধিকাংশ বিভাগেই কম বেছি পৰিমাণে সামৰি লৈছে 'সেউজ বাজেট' ৷ এইবাৰ ৰাজ্য চৰকাৰে ধাৰ্য কৰিছে ১২৫০০ কোটিৰ সেউজ বাজেট ৷ ৭টা থীম, ৭৫টা ACTIONৰে সমৃদ্ধ এই 'মিছন লাইফ' কিয় প্ৰয়োজন অসমক ? যোৱা ১৪মাৰ্চত অসম বিধানসভাত স্বাস্থ্যমন্ত্ৰী কেশৱ মহন্তই অসমৰ পাঁচখন চহৰ দেশৰ আটাইতকৈ প্ৰদূষিত স্থানৰ ভিতৰত আছে বুলি উল্লেখ কৰিছিল ৷ য'ত আছে, গুৱাহাটী, নগাঁও, নলবাৰী, শিৱসাগৰ, শিলচৰ ৷ অসমত বায়ুৰ গুণাগুণ বেয়া হোৱাৰ মূলতে ব্ৰহ্মপুত্ৰৰ পৰা অহা বালি আৰু চাৰিওফালৰ পাহাৰৰ পৰা অহা ধূলি, নিৰ্মাণ কাৰ্যৰ পৰা অহা ধূলি বুলি সদৰী কৰিছিল স্বাস্থ্য মন্ত্ৰী গৰাকীয়ে ৷ চৰকাৰৰ দাবী পাহাৰত বনানীকৰণ অভিযান, ৰাজহুৱা পৰিবহণ ব্যৱস্থাৰ আধুনিকীকৰণ (CNG)  আৰু পৰিৱেশৰ অনুকূল মানুহৰ জীৱনশৈলীৰ পৰিৱৰ্তন কৰা হৈছে। আৰু এই পৰিৱেশ অনুকূল জীৱনশৈলীতে সোমাই আছে মিছন লাইফ ৷ চৰকাৰে আৰম্ভ কৰা এই মিছন লাইফক আদৰণি সদনত বিষয়টোক লৈ প্ৰশ্ন উত্থাপন কৰা অগপ বিধায়ক ৰমেন্দ্ৰ নাৰায়ণ কলিতাৰ, "ভয়াৱহ প্ৰদূষণৰ পৰা ৰক্ষা কৰিবলৈ চৰকাৰে ব্যৱস্থা ল'ব লাগে বুলি কৈছিলোঁ ৷ ভাল লাগিছে চৰকাৰে আৰম্ভ কৰিছে কাম ৷" মঙলবাৰে গুৱাহাটী মেডিকেল কলেজৰ প্ৰেক্ষাগৃহত 'মিছন লাইফ' উন্মোচন কৰিলে মুখ্যমন্ত্ৰী ড৹ হিমন্ত বিশ্ব শৰ্মাই ৷ এই অনুষ্ঠানত মুখ্যমন্ত্ৰীয়ে ক'লে, "প্ৰধানমন্ত্ৰীয়ে কাইলৈৰ পৰা এটা সপ্তাহ পৰিৱেশ অনুকূল জীৱনশৈলীৰ বাবে কাম কৰাৰ আহ্বান কৰিছে ৷ আমি পৰিৱেশৰ প্ৰতিকুলে কাম কৰি থকাৰ বাবে পৰিৱেশৰ পৰা প্ৰত্যাহ্বানে ডাঙৰ সমস্যা সৃষ্টি কৰিছে । গোলকীয় উষ্ণতা বৃদ্ধিৰ স্তৰ ১.৫ ছেলছিয়াছ বঢ়াৰ অনুমান‌ কৰা হৈছে ।পৰিৱেশৰ সুৰক্ষাৰ স্বাৰ্থত ৬০৬৭ হেক্টৰ মাটি বেদখলৰ পৰা মুক্ত কৰিছে চৰকাৰে ৷ পৰিৱেশ সন্তুলন কৰাৰ উদ্দেশ্যে এই উচ্ছেদ চলোৱা হৈছে । উচ্ছেদ চলোৱা পাছতেই জীৱজন্তু বোৰ নিজৰ ঠাইলৈ ঘূৰি আহিছে ৷ চৰকাৰী প্ৰচেষ্টাৰ এটা সীমা থাকে, যদি চৰকাৰে গছ-গছনি ৰোপন কৰাৰ কথা ভাবে বছৰটোত ২ লাখ গছ ৰুব পৰা যাব । কিন্তু অসমৰ প্ৰতিজন জনতাই যদি গছ ৰোপন কৰে তেনেহলে অসমত বহুত গছেই জী উঠিব । মানুহৰ জীৱনৰ লগত যদি ই সমাহিত নহয় তেনেহ'লে সফল নহয় ৷ প্ৰধানমন্ত্ৰী ডাঙৰীয়াৰ সদিচ্ছাৰ বাবে ভাৰতে ২০৩০ চনৰ ভিতৰত ৫০০ গিগাৱাট চ'লাৰ পাৱাৰ উৎপাদন‌ কৰিব ৷ গুৱাহাটী মহানগৰীত ২০০ খন ইলেক্ট্ৰিক বাছ কিনাৰ সিদ্ধান্ত লৈছে অসম চৰকাৰে ৷ বৰ্তমান ১০০ খন চি এন জি বাছ গুৱাহাটীত চলি আছে ৷"

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।