আকৌ BJPৰ কাষ চাপিছে হাগ্ৰামাৰ BPF দল, ৰাজনৈতিক নহয় বিধানমণ্ডলতহে হেনো BPFৰে BJPৰ মিত্ৰতা!

বিৰোধী আসনত বহিবলৈ কোনো পধ্যেই সাজু নথকা হাগ্ৰামা মহিলাৰী (Hagrama Mohilary)নেতৃত্বাধীন BPFয়ে অৱশেষত পুনৰ মিত্ৰতা কৰিলে মুখ্যমন্ত্ৰী ড° হিমন্ত বিশ্ব শৰ্মা (Himanta Biswa Sarma)ৰ সৈতে ৷ এতিয়াৰে পৰা অসম বিধানসভা (Assam Assembly)ৰ মজিয়াত শাসকীয় পক্ষৰ বেঞ্চত বহিব BPFৰ বিধায়কসকল ৷ এই কথা আনুষ্ঠানিকভাৱে দেওবাৰে ঘোষণা কৰাৰ পিছতে সৰৱ হৈ উঠিল বিৰোধী দলপতি দেৱব্ৰত শইকীয়া ৷

ক্ষমতা নহ'লে যেন শূন্য হাগ্ৰামা মহিলাৰী ৷ ক্ষমতাৰ বাঘজৰী হাতত থাকিবই লাগিব ৷ নহ'লে যেন নামেই নহয় হাগ্ৰামাৰ ৷ সৰ্বানন্দ সোণোৱাল পুনৰ মুখ্যমন্ত্ৰী হ'ব বুলি কৈ পুৰণি বন্ধু ড° হিমন্ত বিশ্ব শৰ্মাৰে সম্পৰ্ক বিচ্ছিন্ন হোৱাৰ পিছত মিত্ৰতা ছেদ হৈছিল হাগ্ৰামা মহিলাৰীৰ ৷ কেৱল মিত্ৰতা ছেদ হোৱাতেই নৰ'ল গৈ, BTCৰ শাসনৰ পৰাও হাটাও হৈছিল হাগ্ৰামা মহিলাৰী ৷ শেষত বিগত বিধানসভাৰ নিৰ্বাচনত বাৰখনৰ ভিতৰত চাৰিখনতে সীমাবদ্ধ হৈ থাকিল হাগ্ৰামাৰ দিছপুৰ চলো ৰথখন ৷

BTRত প্ৰমোদ বড়োক বড়োভূমিৰ শাসনৰ বাঘজৰীডাল এৰি দিবলগীয়া হোৱাৰে পৰা হাগ্ৰামা মহিলাৰীয়ে শাসকীয় BJP বিশেষকৈ ড° হিমন্ত বিশ্ব শৰ্মাৰ সৈতে মিত্ৰতা স্থাপন কৰিবলৈ দিনে-ৰাতিয়ে চেষ্টা চলাই আছিল ৷

শেষত হাগ্ৰামাৰ চেষ্টা সফল হ'ল ৷ মুখ্যমন্ত্ৰীয়ে BPFৰে কৰিলে বিধানমণ্ডল কেন্দ্ৰিক মিত্ৰতা ৷ হাগ্ৰামা মহিলাৰীৰ হৈ BPFৰ তিনি বিধায়ক ক্ৰমে দুৰ্গা দাস বড়ো, ৰবিৰাম নাৰ্জাৰী আৰু চৰণ বড়োক কাষত বহুৱাই দেওবাৰে জনতা ভৱনৰ নিজ সভাকক্ষত মুখ্যমন্ত্ৰী ড° শৰ্মাই ক'লে- “BPFৰে এই মিত্ৰতা ৰাজনৈতিক নহয়, বিধানমণ্ডলতহে ৷ বিধানসভাত শাসকীয় বেঞ্চত বহিব BPFৰ বিধায়ক ৷”

BPFৰে ৰাজনৈতিকভাৱে মিত্ৰতা হ'বলৈ আৰু কিছু দিনৰ প্ৰয়োজন হ'ব বুলি ক'লে মুখ্যমন্ত্ৰীয়ে ৷

ইপিনে মহাজোঁট এৰি শাসকীয় পক্ষলৈ ৰাওনা হোৱা হাগ্ৰামা মহিলাৰীক কটাক্ষ কৰি সোমবাৰে বিৰোধী দলপতি দেৱব্ৰত শইকীয়াই ক'লে- “হাগ্ৰামা মহিলাৰীয়ে নিজকে সদায় সুবিধাবাদী বুলি কয় ৷ শাসকীয় পক্ষত থকাটো হাগ্ৰামাৰ ধৰ্ম ৷ সেই হিচাপতে BJPৰ সৈতে এতিয়া গৈছে ৷”

বিগত বিধানসভাৰ নিৰ্বাচনত BPFক বাৰখন আসন এৰি দিয়াৰ পক্ষপাতী নাছিল হেনো বিৰোধী দলপতি দেৱব্ৰত শইকীয়া ৷