Golf Carts For Assam MLA: বিধায়কৰ বাবে অসম বিধানসভাই কিনিলে পাঁচখন ইলেক্ট্ৰিক গ'ল্ফ কাৰ্ট

পৰিৱৰ্তন আহিছে সকলোতে ৷ ৰাইজৰ মাজতো আহিছে, জনতা ভৱনতো আহিছে আৰু অসম বিধানসভা (Assam Assembly)তো আহিছে ৷ ইয়াৰ মাজতে অসম বিধানসভা লৈ আহিছে পাঁচখনকৈ ইলেক্ট্ৰিক গ'ল্ফ কাৰ্ট (Golf Cart) ৷ বিধানসভাৰ অধিৱেশনৰ সময়ত বিধায়কসকলে নিজৰ গাড়ীৰে আহিব নালাগে সদনলৈ, তাৰ বিপৰীতে আহিব পাৰিব নতুনকৈ অনা ইলেক্ট্ৰিক গ'ল্ফ কাৰ্টেৰে ৷

সাধাৰণতে দেখা যায় গ'ল্ফ ফিল্ডত ইলেক্ট্ৰিক গ'ল্ফ কাৰ্ট ৷ বহু ক্লাৱ, বিমান বন্দৰতো ব্যৱহাৰ কৰা দেখা যায় ৷ এই গ'ল্ফ কাৰ্ট এইবাৰ কিনিলে অসম বিধানসভাই ৷ বিধানসভাৰ অধিৱেশন চলি থকাৰ সময়ত বিধানসভাৰ সচিবালয়ত পাৰ্কিঙৰ যথেষ্ট সমস্যা হয় ৷ সেয়ে বিধায়ক আৱাসৰ পৰা বিধানসভালৈ বিধায়কসকলক অনা-নিয়া কৰিবলৈ ব্যৱহাৰ কৰা হ'ব গ'ল্ফ কাৰ্ট ৷ পাঁচখন ইলেক্ট্ৰিক গ'ল্ফ কাৰ্ট কিনিলে বিধানসভাই ৷ এই কথা জনালে বিধানসভাৰ অধ্যক্ষ বিশ্বজিত দৈমাৰীয়ে ৷

পাৰ্কিং সমস্যা সমাধানৰ বাবে বিধানসভাই গ'ল্ফ কাৰ্টেই নহয়, বিধানসভাৰ বাবে কিনিছে এখন ICU ব্যৱস্থা থকা উন্নত মানৰ এম্বুলেন্স ৷ ফেব্ৰুৱাৰীৰ শেষত আহি পাব সেই অত্যাধুনিক এম্বুলেন্স ৷ এই কথা শুকুৰবাৰে জনালে অধ্যক্ষ বিশ্বজিত দৈমাৰীয়ে ৷

ইয়াৰ লগতে ১৯৬২ৰ পৰা ছপা নোহোৱা বিধানসভাৰ প্ৰছিডিংসমূহো ছপা কৰাৰ বাবে উদ্যোগ লৈছে অধ্যক্ষ বিশ্বজিত দৈমাৰীয়ে ৷

শেহতীয়াকৈ বিধায়কসকলৰ বাবে কিনা এই ইলেক্ট্ৰিক গ'ল্ফ কাৰ্ট সমূহ অহা ১৪ মাৰ্চৰ পৰা অনুষ্ঠিত হ'বলগীয়া বাজেট অধিৱেশনৰ পৰা ব্যৱহাৰ কৰা হ'ব ৷