Himanta Biswa Sarma: 'নেপালীসকলক বিদেশী বুলি গণ্য নকৰিব'- ডি ভোটাৰৰ নামত গোৰ্খাসকলক হাৰাশাস্তি নকৰিবলৈ আৰক্ষীক সতৰ্ক কৰি দিলে মুখ্যমন্ত্ৰীয়ে

বুধবাৰে মুছলপুৰৰ নিকাছিত অনুষ্ঠিত হোৱা অসম গোৰ্খা সন্মিলনৰ ২৭ তম ত্ৰি বাৰ্ষিক অধিবেশনৰ মুকলি সভাত অংশগ্ৰহণ কৰে মুখ্যমন্ত্ৰী হিমন্ত বিশ্ব শৰ্মাই ৷ সভাত ভাষণ প্ৰদান কৰি মুখ্যমন্ত্ৰী ড৹ হিমন্ত বিশ্ব শৰ্মাই গোৰ্খাসকল অসমৰ এক অবিচ্ছেদ্য অংগ বুলি অভিহিত কৰে ৷

ভাষণ প্ৰসংগত মুখ্যমন্ত্ৰীয়ে কয় যে,  'অসমৰ জাতীয় জীৱনত গোৰ্খাসকলৰ অৱদান অতুলনীয় ৷ প্ৰাচীন কালৰে পৰা অসমত গোৰ্খাসকলে বসবাস কৰি আহিছে ৷ গোৰ্খাসকলে স্বাধীনতা আন্দোলনত অংশ লৈ দেশপ্ৰেম আৰু জাতীয়প্ৰেমৰ পৰিচয় দি আহিছে ৷' মহাপুৰুষ শংকৰদেৱে প্ৰতিষ্ঠা কৰা সত্ৰসমূহতো গোৰ্খাসকলে জড়িত আছিল বুলি মুখ্যমন্ত্ৰীগৰাকীয়ে মন্তব্য কৰে ৷

ইফালে নেপালীসকলক বিদেশী বুলি গণ্য নকৰিবলৈ আহ্বান জনাই মুখ্যমন্ত্ৰী হিমন্ত বিশ্ব শৰ্মাই। লগতে নেপালীসকলক জাতিগত প্ৰমাণপত্ৰ দিবলৈ চৰকাৰী বিষয়া-কৰ্মচাৰীক নিৰ্দেশ দিয়ে মুখ্যমন্ত্ৰীয়ে ৷

আনহাতে আৰক্ষীকো সতৰ্ক কৰি দিয়ে মুখ্যমন্ত্ৰীয়ে ৷  মুখ্যমন্ত্ৰীয়ে কয় যে, 'ডি ভোটাৰৰ নামত অযথা হাৰাশাস্তি নকৰিব ৷ অসমীয়া ভাষীসকলৰ সমান্তৰালকৈ গোৰ্খাসকলক মৰ্যাদা প্ৰদান কৰা হৈছে ৷ নেপালী ভাষী ছাত্ৰ- ছাত্ৰীসকলে নৱম শ্ৰেণীতে জাতিগত প্ৰমাণ পত্ৰ লাভ কৰিব।'