Rameswar Teli in Nazira : আগন্তুক এটা বছৰত ১০ লাখ চাকৰি দিয়াৰ সিদ্ধান্ত ভাৰত চৰকাৰৰ, নাজিৰাত ক'লে কেন্দ্ৰীয় পেট্ৰ'লিয়াম মন্ত্ৰীয়ে

আগন্তুক এটা বছৰত ১০ লাখ চাকৰি দিব ভাৰত চৰকাৰে ৷ ইতিমধ্যে এই নিযুক্তি প্ৰক্ৰিয়া আৰম্ভ হৈছে। শিৱসাগৰ জিলাৰ নাজিৰাৰ মেকিপুৰ চাহ বাগিচাত  অনুষ্ঠিত হোৱা অসম চাহ জনগোষ্ঠী সাহিত্য সভাত অংশগ্ৰহণ কৰি সংবাদ মাধ্যমৰ আগত এই কথা প্ৰকাশ কৰে কেন্দ্ৰীয় পেট্ৰ’লিয়াম মন্ত্ৰী ৰামেশ্বৰ তেলীয়ে।

মন্ত্ৰীজনে যোৱা মাহৰ ২২ তাৰিখে আম্বালাত ৭৫ হাজাৰ নিযুক্তি প্ৰদান কৰা হৈছে বুলি প্ৰকাশ কৰাৰ লগতে অহা ২২ নৱেম্বৰ তাৰিখে পুনৰ ডিমাপুৰত ৭৫ হাজাৰ যুৱক-যুৱতীক নিযুক্তি প্ৰদান অনুষ্ঠানত উপস্থিত থাকিব বুলি প্ৰকাশ কৰে।

আগন্তক ১২ মাহত প্ৰতি মাহে ভাৰত চৰকাৰে ৭৫ হাজাৰ যুৱক-যুৱতীক নিযুক্তি প্ৰদান কৰি যাব বুলিও মন্তব্য কৰে কেন্দ্ৰীয় মন্ত্ৰী ৰামেশ্বৰ তেলীয়ে ৷ পেট্ৰ’লিয়াম, ৰে'ল বিভাগ, বেংক, ডাক বিভাগ, শ্ৰম বিভাগ আদি প্ৰত্যেকতে পদ খালী হৈছে বুলি প্ৰকাশ কৰি শিক্ষিত নিবনুৱা যুবক-যুৱতীসকলক আবেদন কৰিবলৈ আহ্বান জনোৱাৰ লগতে মন্ত্ৰীগৰাকীয়ে কয় এক স্বচ্ছ প্ৰক্ৰিয়াৰে সমগ্ৰ নিযুক্তি প্ৰক্ৰিয়া চলিব ৷

ইয়াৰ লগতে ১৮ ৰ পৰা ২০  নৱেম্বৰলৈ শিৱসাগৰ জিলাৰ নাজিৰাৰ মেকিপুৰ চাহবাগিচাত তিনিদিনীয়া কাৰ্যসূচীৰে অনুষ্ঠি’ত হোৱা অসম চাহ জনগোষ্ঠী সাহিত্য সভাৰ চতুৰ্থ দ্বি-বাৰ্ষিক অধিৱেশনৰ  দ্বিতীয় দিনা সন্ধিয়া ছাত্ৰ-ছাত্ৰীৰ  বিবিধা অনুষ্ঠানত অংশগ্ৰহণ কৰি কেন্দ্ৰীয় মন্ত্ৰী ৰামেশ্বৰ তেলীয়ে কয় যে অসমত সাহিত্য সভাৰ ক্ষেত্ৰখনত বহু জাতি-জনগোষ্ঠীয়ে নিজ নিজ ভাষাত সাহিত্য চৰ্চা কৰাৰ বিপৰীতে চাহ জনগোষ্ঠীয় সাহিত্য সভাই অসমীয়া ভাষাতে সাহিত্য চৰ্চা অব্যাহত ৰখাটোৱে এক সুন্দৰ বাৰ্তা বহন কৰিছে ৷ মন্ত্ৰীগৰাকীয়ে কয় যে চাহ জনগোষ্ঠীয় লোকসকলে নিজকে অসমীয়া হিচাপেই পৰিচয় দি আহিছে ৷