এখন ব্যতিক্ৰমী প্ৰাথমিক বিদ্যালয় ! ৰাজধানী এক্সপ্ৰেছৰ আৰ্হিত সজাই তুলিছে বিদ্যালয়ৰ শ্ৰেণীকোঠাসমূহ ...

ৰাজধানী এক্সপ্ৰেছ ৰে’ল গাড়ীৰ আৰ্হিত সজোৱা গোৱালপাৰাৰ এখন চৰকাৰী বিদ্যালয়ে এতিয়া সকলোৰে বাবে আকৰ্ষণৰ কেন্দ্ৰবিন্দু হৈ পৰিছে ৷ শেহতীয়াকৈ চ’ছিয়েল মিডিয়াতো চৰ্চিত এই বিশেষ বিদ্যালয়খন ৷

ব্যক্তিগত খণ্ডৰ বিদ্যালয়ৰ সৈতে সমানে ফেৰ মাৰিবলৈ সক্ষম হোৱা গোৱালপাৰাৰ কৃষ্ণাইৰ আশুডুবী প্ৰাথমিক বিদ্যালয়খনে সম্প্ৰতি আকৰ্ষিত কৰিছে শৈক্ষিক মহলৰ লগতে ছাত্ৰ-ছাত্ৰীকো ৷ এগৰাকী প্ৰধান শিক্ষকৰ নিজা প্ৰচেষ্টাত অন্য ৰূপ লাভ কৰিছে বিদ্যালয় খনে ৷ সম্পূৰ্ণ নিজা খৰচৰে সজাই তুলিছে বিদ্যালয়খন ৷ কাৰ্যালয় গৃহটো ৰে’লৰ ইঞ্জিনৰ আৰু শ্ৰেণী কোঠা সমূহ একো একোটা ডবা সদৃশকৈ সজাই তুলিছে ৷ ১৯৫০ চনত স্থাপিত কৃষ্ণাইৰ আশুডুবী প্ৰাথমিক বিদ্যালয়ৰ প্ৰধান শিক্ষক অশোক নাথে ব্যক্তিগত প্ৰচেষ্টাত ৰাজধানী এক্সপ্ৰেছ ৰেলগাড়ীৰ আৰ্হিত সজাই তুলিছে বিদ্যালয়ৰ শ্ৰেণীকোঠা সমুহ ৷ ব্যক্তিগতখণ্ডৰ বিদ্যালয়ৰ পৰিৱৰ্তে ছাত্ৰছাত্ৰী সকলোক চৰকাৰী বিদ্যালয়ৰ প্ৰতি আকৰ্ষণৰ চেষ্টা প্ৰধান শিক্ষকগৰাকীৰ ৷ যি সময়ত ব্যক্তিগত খণ্ডৰ বিদ্যালয়ৰ প্ৰতি অভিভাৱক তথা ছাত্ৰ-ছাত্ৰীসকল আকৃষ্ট হৈছে তেনে সময়তে উক্ত চৰকাৰী বিদ্যালয়ৰ আটকধুনীয়াৰূপে মোহিত কৰিছে শৈক্ষিক মহলক ৷ আনহাতে ব্যক্তিগত খণ্ডৰ বিদ্যালয় এৰি চৰকাৰী এই প্ৰাথমিক বিদ্যালয়খনলৈ ঢাপলি মেলিছে ছাত্ৰ-ছাত্ৰীসকল ৷ ইফালে বিদ্যালয়ৰ শিক্ষক -শিক্ষয়িত্ৰী সকলে ব্যক্তিগত বিদ্যালয়ৰ দৰে ছাত্ৰ-ছাত্ৰী সকলক প্ৰদান কৰি আহিছে শিক্ষা ৷ গুণগত শিক্ষাৰ মান উন্নত কৰাৰ উপৰি প্ৰদান কৰিছে নৈতিকতাৰ শিক্ষাও ৷শেহতীয়াকৈ বিদ্যালয়খন  আৰু অধিক সুন্দৰ ৰূপত সজোৱাৰ বাবে বহু পৰিকল্পনা গ্ৰহণ কৰিছে প্ৰধান শিক্ষক গৰাকীয়ে ৷ এই বিদ্যালয় খনে কেৱল যে ছাত্ৰ - ছাত্ৰী আৰু অভিভাৱকৰে দৃষ্টি আকৰ্ষণ কৰিছে তেনে নহয় , স্থানীয় লোকসকলৰ চেল্ফী পইণ্ট হৈ পৰিছে বিদ্যালয়খন ৷

Read all News in Assamese, Assam News Today, Entertainment News in Assamese, Business News in Assamese, Sports News in Assamese, Health News in Assamese, India News in Assamese

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।