বৰ্ষীয়ান গান্ধীবাদী, মুক্তিযোদ্ধা, পদ্মশ্ৰী হেম ভৰালীৰ দেহাৱসান

বৰ্ষীয়ান মুক্তিযোদ্ধা, প্ৰবীন গান্ধীবাদী নেতা ,পদ্মশ্ৰী হেম ভৰালী আৰু নাই। বুধবাৰে বিয়লি গুৱাহাটীৰ পূৱ-শৰণীয়াস্থিত নিজ বাসগৃহত ভাৰতৰ স্বাধীনতা সংগ্ৰামৰ জীৱন্ত দলিল বুকুত বান্ধি লৈ ফুৰা স্বৰাজ আন্দোলনৰ বীৰ সেনানীগৰাকীয়ে শেষ নিশ্বাস ত্যাগ কৰে । মৃত্যুৰ সময়ত তেখেতৰ বয়স আছিল ১০২ বছৰ।

ভাৰত চৰকাৰে পদ্মশ্ৰী, জাতীয় সংহতি বঁটা আদি বিভিন্ন সন্মানেৰে বিভূষিত কৰা স্বাধীনতা সংগ্ৰামী হেম ভৰালীয়ে ৪২'ৰ আন্দোলনত কেইবাবাৰো কাৰাবাস খাটিছিল । বিনোৱা ভাৱেৰ 'ভূদান যজ্ঞ'ত সক্ৰিয়ভাৱে অংশ লৈ তেখেতে ৰঙিয়াকে ধৰি ৰাজ্যৰ বিভিন্ন প্ৰান্তত পদব্ৰজে প্ৰচাৰ কাৰ্য্য চলাই জনসাধাৰণক উদ্বুদ্ধ কৰি তুলিছিল ।

ৱাৰ্ধাত বুনিয়াদী শিক্ষাৰ প্ৰশিক্ষণ সম্পূৰ্ণ কৰি পিছলৈ তেখেতে গুৱাহাটীৰ পূব-শৰণীয়াত 'কস্তুৰবা আশ্ৰম' স্থাপনত আগভাগ লৈ গান্ধীজীৰ বুনিয়াদী শিক্ষাৰ প্ৰচাৰ আৰু প্ৰসাৰত মুখ্য ভুমিকা পালন কৰিছিল । কস্তুৰবা আশ্ৰমত সুদীৰ্ঘ দিন ধৰি সমাজ সংস্কাৰৰ কামত ব্ৰতী হৈ থকা ভাৰতৰ সংগ্ৰামী ইতিহাসৰ 'মহীৰূহ' হেম ভৰালীয়ে সমাজৰ বিভিন্ন শ্ৰেণীৰ মহিলাক একগোট কৰি আত্মসহায়ক গোট স্থাপন কৰি বোৱা-কটা, খাদী- গ্ৰামোদ্যোগ আদিৰ জৰিয়তে স্বনিয়োজনৰ পথ দেখুৱাৰ লগতে গান্ধী- দৰ্শন আৰু গ্ৰাম-স্বৰাজৰ সোপান অংকণ কৰিছিল ।

বাৰ্ধক্যজনিত কাৰণত প্ৰায় এমাহে গুৱাহাটীৰ এখন ব্যক্তিগত নাৰ্চিং হ'মত চিকিৎসাধীন হৈ আছিল হেম ভৰালী। মৃত্যুৰ পূৰ্বে তেখেতে গুৱাহাটী চিকিৎসা মহাবিদ্যালয় আৰু হাস্পতালক দান কৰি থৈ গৈছিল তেখেতৰ শৰীৰ । আজি তেখেতৰ নশ্বৰ দেহ চিকিৎসা মহাবিদ্যালয় খনলৈ অনা হয়। হেম ভৰালীৰ মৃত্যুত মুখ্যমন্ত্ৰী সৰ্বানন্দ সোণোৱালে গভীৰ শোক প্ৰকাশ কৰিছে।