অনলাইন লোণৰ নামত সাংবাদিকৰ পৰা লুটিলে ৩ লাখ ১০ হাজাৰ, ছয়গাঁও আৰক্ষীৰ জালত অভিযুক্ত

অনলাইন লোণৰ নামত দেশত এতিয়া জাল পাতিছে প্ৰৱঞ্চকে। এই প্ৰৱঞ্চকৰ জালত পৰি হাহাকাৰ ছয়গাঁৱৰ সাংবাদিক ভগৱান দাসৰ। ভগৱান দাসৰ পৰা অতি কৌশলেৰে সৰকালে  ৩ লাখ ১০ হাজাৰ টকা। পিছত একাউণ্টৰ পৰা বৃহৎ পৰিমাণৰ এই ধন হেৰুৱাই হাবুডুবু খোৱা ভগৱান দাস ওচৰ চাপিল আৰক্ষীৰ। দাসৰ অভিযোগৰ ভিত্তিত ছয়গাঁও আৰক্ষীয়ে কলকাতাৰ শান্তিময় নগৰত অভিযান চলাই কৰায়ত্ত কৰিলে এজনক।

Techno এছ’চিয়েট নামৰ ভুৱা প্ৰতিষ্ঠানটোৰ মূল প্ৰৱঞ্চক প্ৰণৱ মহন্তক গ্ৰেপ্তাৰ কৰি লৈ আহিল ছয়গাঁও আৰক্ষীয়ে। লখিমপুৰৰ প্ৰণৱ মহন্তই কলকাতাত বাহৰ পাতি ভুৱা অনলাইন লোণৰ বজাৰ খুলিছিল। ছয়গাঁও থানাৰ ভাৰপ্ৰাপ্ত আৰক্ষী বিষয়া কপিল পাঠকে প্ৰৱঞ্চক প্ৰণৱ মহন্তক গ্ৰেপ্তাৰ কৰাৰ বাবে তিনিদিন ধৰি কলকতাত বাহৰ পাতি আছিল।

ধৃত প্ৰণৱ মহন্তৰ পৰা ৩২খন ATM কাৰ্ড, বহুকেইটা ম’বাইল হেণ্ডছেটসহ ভুৱা নথি–পত্ৰ জব্দ কৰিছে। সম্প্ৰতি আৰক্ষীৰ জেৰা অব্যাহত আছে। এতিয়া ভগৱান দাসে এই ৩ লাখ ১০ হাজাৰ টকা ঘুৰাই পাব নে নাই তাক লৈ চিন্তিত হৈ পৰিছে।