Rajen Gohain : নদীবান্ধে উপকাৰতকৈ বেছি অপকাৰহে কৰিছে, নদীবান্ধে ব্যাপক হাৰত পানী এৰি দিয়াৰ ফলতেই নগাঁৱত জলপ্ৰলয়ৰ সৃষ্টি হৈছে : ৰাজেন গোহাঁই

এইবাৰ নদীবান্ধৰ বিৰুদ্ধে তৎপৰ হ'ল প্ৰাক্তন কেন্দ্ৰীয় মন্ত্ৰী ৰাজেন গোহাঁই। নদীবান্ধৰ বাবেই নগাঁৱত জলপ্ৰলয়ৰ সৃষ্টি হোৱাৰ কথা উল্লেখ কৰি প্ৰাক্তন কেন্দ্ৰীয় মন্ত্ৰীগৰাকীয়ে কয়, "নদীবান্ধে উপকাৰতকৈ বেছি অপকাৰহে কৰিছে। নদীবান্ধ সমূহে জোখ-মাখ নোহোৱাকৈ পানী এৰি দিয়াৰ ফলতে মধ্য অসমত জলপ্ৰলয়ৰ সৃষ্টি কৰিছে। চৰকাৰে এইক্ষেত্ৰত নদীবান্ধ কৰ্তৃপক্ষৰ সৈতে আলোচনা কৰি ব্যৱস্থা গ্ৰহণ কৰিব লাগে।"

আনহাতে বানপানীত এইবাৰ মধ্য অসমত ৰাইজৰ ব্যাপক ক্ষয়-ক্ষতি কৰাৰ কথা উল্লেখ কৰি প্ৰাক্তন মন্ত্ৰীগৰাকীয়ে কয়, "মই মুখ্যমন্ত্ৰী ড° হিমন্ত বিশ্ব শৰ্মাক অনুৰোধ জনাইছো তেওঁ কেন্দ্ৰীয় চৰকাৰৰ সৈতে আলোচনা কৰি অসমৰ বাবে অন্তত ৪-৫ হাজাৰ কোটি টকাৰ সাহায্য প্ৰদান কৰিবলৈ চেষ্টা কৰক।"

কলং-কপিলীৰ বানে নগাঁৱৰ মীনপালকৰ ব্যাপক ক্ষয়-ক্ষতি কৰাৰ কথা উল্লেখ কৰি মন্ত্ৰীগৰাকীয়ে লগতে কয়, "নগাঁৱৰ মীন পালকৰ বিলাই নাইকীয়া হৈছে। সকলো মীন পালকৰ লোকচান হৈছে। মোৰ নিজৰ কৃষিপামখনো বানত বুৰ গ'ল। মাছ-খেতি চব শেষ হ'ল। জীৱনত এনেকুৱা জলপ্ৰলয় দেখা নাছিলো।"

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।